ایندی مَیه او زامان دیر!

کئچن گونلرده کنده ساری گئتمیشدیم، چوبانلاری گؤردوم. داوار سوروسونو داغ دان کنده ساری یئندیریرلر. اؤزاؤزومه دئییرم یایین بو واختی قویون قوزو یایلاق دا اولسون گرک. ماشینین شوشه سینی یئندیریب دئییرم برکتلی اولسون آ خانعلی، نه یاخجی سورونو داغ دان کنده یئندیریبسن!؟

دئییر: پَحووو ایندی میه او زامان دیر! اوغرو مَیه قویار داغدا چوبانا قویون قوزو قالسین. ائوی ییخیلمیشلار گئجه یاریسی گلیب ایت لرین باشینا نم نه اویون گتیریب چوبانین ال آیاغینی باغلاییب اللرینه کئچن توخلونو شیشه یی وانته آتیب آپاریرلار.

کندن چیخیب شهره ساری گلیرسن بوتون یول بویو جاده نین چیراقلاری، شهر ایچی خیابانلارین چیراقلاری هامیسی سؤندورولوب بلکه برقی الده ائدیب، ما می توانیم دئسینلر! هَیه یاراشیر ائله، کاردان دوشموش کوهنه نیروگاهلاری ایله برقی الده ائده جکسیز. بوتون بونلار عمرانی بودجه ایسته ییر یوخسا مین بیر قارنی یوغون موفته خور ارگانلارا اوزده فرهنگی اصلینده ضدفرهنگی کلان بودجه آییرماقلا مملکت ایره لی لمز.

بیر زامان بیزیم آری ـ تمیز شهرلرده، اولماز افسانه نظره گلن سیم کابل اوغرولاری یوللاردا فیغان ائدیر ایندی. سیم بانلاری دیندیرسن دییه جکلر بویاندان چکیریک اویاندان کسیرلر. سیزجه بونلار کیمین حسابینا کسیلیر. ایش سیز لیک حسابینا، یوخسوزلوق حسابینا. بمبئی لشمیش شهرلریمیزین مطلق کاسیب فاغیر یوخسا دؤولتلی لیک حسابینا.

یوخ قارداشیم، یوخ دینداشیم، قورو قوروسونا حالوا حالوا دئمکله آغیز شیرین اولماز. مملکتین وضعی قولای دیر. باهالیق فیغان ائدیر ایش سیزلیک بیداد ائدیر. رادیو تلویزیونا باخمایین شرفسیزلیک بؤرکونو اوجا قویوب بیست و سی ده آهای خونه دار بچه دار زنبیل و بردار بیار دئییه جار چکیب دئییر تویوق اوجوزلاشیب آلین یئیین دینمه یین!

قملی کدرلی افسرده میللته، شادلیقدان بئزار میللته البته کی حؤکوم سورمک راحات دیر. اوناگؤره ده حالیمیز نییه خوش اولسون گرک. بونو ائله بئینیمیزه سوخوبلار، گؤروسن بیری گولنده دئییرلر ضررین چکرسن چوخ گولمه آما هر نه قدر چوخ آغلاسان دئییرلر آللاه ثوابینا یازسین. قاداسینی آلیم آللاهین، هاردا معطل قالدیقدا آللاهدان مایا قویوب دئییرلر: تقدیر الهی دیر، مصلحت الهی دیر، مشیت الهی دیر، ایمتحان الهی دیر. الهی نین قربانی اؤلوم، الهی دئییبدی مین ایللر بویو گمی لر اوزونده اوزن اورمو گولونون اورتاسینا داغ بویدا توپراق تؤکوب قوروداسیز یوخسا الهی دئییب ایشکنه سویو ایچیب چوخ شوکور دئیه گؤزلریمیزی یوموب باشی آتیب یئره یاتاق.

ایتگین قبرین نورلا دولسون معجز، ائله اصیل مسلمان دا سن ایدین باخ گؤر نئجه اوزون سؤزون قیساسینی دئییر:

الهی ایلدیریم گؤندر، جهالت پرده سین یاندیر ـ قارانلیقدا قالیبدیر خلق عالم بیر ایشیقلاندیر.

آیین شایین ـ 020530