مادمازل اولكر اوجقار
«آیین شایین»
مادمازل اولکر اوجقار
روزنامه مهد تمدن - صفحه سانجاق - شماره 414 - چهارشنبه 96/11/11
یای اولا یوخسا قیش ایکی اَلی همه شه جیبلرینده اولار، دئیه سن تبریزین سویوغونو یالنیز اولکره پای وئریبلر. بیلمیرم بلکه ده مد و یا عادت اولاراق بئله دولانیر! نئجه کی عادت اوزره هر گون آخشام چاغلاری دوه چی یولوندا آددیم آتیب پاریس شعرینی اوخویوردو؛
ساچلاریمی پاریسه ساری هؤرمه دیم بو سحر
گوونجیم قالمادی دوغروسو
قالمادی آرتیق ـ پاریس!
اؤزو دئمیشکن یاشام فانتزیلریندن بیری شعر اوخوماق و اونو یقین قاری ننه سیندن بورج آلمیش! تبریز گؤزه لی پاریس شعرینی ائله احساس ایله اوخویوب رویالارا دالیردی گل گؤره سن. ائله کی اونو اوزاقدان رویت ائدن هر کیمسه اولورسا اولسون، مادمازل اولکر گلیر دئیه اَل ـ آیاغینی ایتیریب پئشوازینا چیخاردی.
چانتاسینی بیر یانلی سالیب، لاب بئله شاعیرلره تای آستاجا آددیم آتیردی، گاهدان دا بیر گولومسه یه رک معنالی گؤزلری ایله، ایلدیر ـ ایلدیر باخیب سانکی بوتون دوه چی قیزلارینا یاندی ـ قیندی ...
بيري يوخ دئيه آخي بوي- بوخونا قوربان اولوم، نييه هر باجادان بويلانيب، هرشئیه قولپ قويورسان؟! دوزاوتوروب، اَيري دانيشماغا نه وار؟!.......
محمدعلی ارجمندی (آيين شايين)