آیین شایین ـ 9

اوروجَکم مقبول، بیزیم گولشَنیمیز، سوبسیدلی تویوغ، دوندارما بوفالو، خیام آغزی و ...

محمدعلی ارجمندی ـ نشریه آغری ـ یکشنبه 8 مرداد 91 شماره 132

سئویملی باجیلاریم، حؤرمتلی قارداشلاریم، ایلک اؤنجه مبارک رمضان آیی مناسبتیله هر بیریزه سلام گؤنده ریب «اوروجَکم مقبول» دئییرم. آللاه هامی یا جان ساغلیغی وئرسین. نوخوشلارادا اؤزلرین نوخوشلوغا وورانلارادا. کیمسه نی قینامیرام. سانکی قدیمدن بو آیدا معده، قارین ـ باغیرساق خسته لرین سایی آرتار!

آما بو آیدا باهالیق سالیب، خالقین قانین شوشه یه چکن آداملارا! نیفرت بسله رم. بوتون مسلمان اؤلکه لرده بو تمیز آی ـ ا گؤره یئییب ـ ایچمه لی، شئی ـ شوی قیمتی یاری یئنسه ده، برکتلی اولسون بیزیم گولشَنیمیزده تویوغ اَتیندن توتدو، آش دویوسونه دَک نئچه قات آرتیب.

شهریار دئمیشکن: کاسیبین قسمتی یوخ، یاغلی پیلوو دوشله َمه یه؟!

کئچن گونلرده اینانیرام سیزلرده منه تای شهرلریمیزده گؤرکملی منظره لرین یاخیندان شاهیدی اولوبسوز. بو گؤز اوینادان گؤرونتولرین بیری تویوغ مارکت لرین یوخسا کامیونلارین قارشیندا صف چکن سَفیل ـ سرگردان جاماعات دیر. هئچ آجیغیزا گلمه سین، ائله بو سفیل ـ سرگردانلاردان بیری ده من اؤزومم! نه بیر ایش، نه گلیر، نه بیر گله جک، آنجاق آچیق ـ آیدین آنلیمیزدا یازیبلار: «ائوین یخیلسین فلَک»

کئچن هفته بیر مارکتین قاباغیندا، آد آپارمیرام موفته رئکلام اولار، ائله بیر قالابالیق دوشموشدور گل گؤره سن. بؤیوک ـ کیچیک، آرواد ـ اوشاق هامی هجوم چکمیشدیر ایکی بود «سوبسیدلی» تویوغ آلیب آپارا. اونودا هئچ سیرادا دوران آداملارین یاری پاییندان چوخونا یئتیرمه دی. آنجاق بونو دئیه بیلَه رم ییرمی ایلدن سونرا او زامانلار برزیل دن گتیریلن «دوندارما بوفالو» اَتلرینی یادیما سالیردی. ایندی آما «قره اؤکوز» اَتینه ده یوخ بلکه هورمون گوجونه شیشمیش «دوندارما تویوغا» صف چکمیشدیلر.

آمان آللاهیم هئئئئی!

ایفطارا یاخین، میلتین چوخونا تای ساللانا ـ ساللانا اَلی بوش ائوه ساری دؤنمکده ایدیم، یاری یولدا نیسگیلی بیر حزین سس منی اؤزونه ساری چکدی.

سنی یاناسان تویوغ آپاران

اودلاناسان تویوغ آپاران

منیم تویوغوم تاوادا

اییسی گلیر هاوادا

یاندیم یاناسان تویوغ آپاران

اودلاناسان تویوغ آپاران

منیم تویوغوم چیل ـ چیلی دیر

دریسی دولو میل ـ میلی دیر

یاندیم یاناسان...

خیاوان قیراغیندا، آروادلارین بیری ائله آغی دئیه رک بو سؤزلری دیلینه گتیریردی، سانکی بیر آدامی اولوب. دئمه آلدیغی ایکی تویوغ دان بیرین اوغرولاییب لار! او بیری یولداشلاری دا بیله سینه اوخشایاراق اؤیود وئریردیلر: قیز اؤل اَری دا! بیر تویوغ اوسته، بیله میزی خالق ایچینده روسوا ائله دین!! قالخ آیاغا گئدک.

دئیه سن اؤزلری بیر ـ ایکی تویوغدان اوترو باش سیندیرماییردیلار!

یازیق آرواد کاف قالاراق، دوداقلاری آراسیندا قارقیش ائله ییب دئییردی: گئت سنی تاپشیردیم ...... یئیه بیلسن یئ . بوغازیندان گلسین!

گؤردویوم صحنه لردن تکجه بیرین سیزه آچیقلادیم. ایندی باخین گؤرون تویوغ قیزیل یئرینده دیر یوخسا یوخ. هئچ اوزاغا گئتمیرم، اورمونون مرکزینه یولوز دوشسه باخین گؤرون کئفی ساز میلت نه طمطراقلا، قولتوقلارینا تویوغ ـ  خوروز ووروب آپاریرلار. اؤزونده هله «کند خوروزو» چوخ چکمز ائله خیام آغزیندا دا جاماعات، اَللرینده خوروز گزدیرَر.

یانی کندلی لرین آللاهی وئریب. نمنه نوخوش، قات، تویوغ ـ خوروزلاری وار ایلیشدیریرلر بو سؤز باز شهرلی لره. اَللرینه دؤنوم بو شهرلی لری گرک بئله ائله یه سن. دوروب ـ اوتوروب کندلی لره سؤز قوشورلار . دا خبرلری یوخدو کندلی اولماسا بیر تیکه یاوان چؤره یی ده تاپیب دیشله مک اولماز. سیزلرده اؤزگه دئییل سیز قورخورام ائله آخیری دا بئله اولا.

رحمتلیک صابیر دؤز دئییرمیش:

سانما اَزدیکجه فلک بیزلری ویرانلیق اولور

اون تمناسی ایله بوغدا دَییرمانلیق اولور

چالخالاندیقجا، بولاندیقجا، زامان نهره کیمی

یاغی یاغ اوسته گئدر، آیرانی آیرانلیق اولور.