آیین شایین 28 ـ گؤره سن شهردار دا ژاپونو مدل یول گئده بیلر!؟
آیین شایین 28
گؤره سن شهردار دا ژاپونو مدل یول گئده بیلر!؟
محمدعلی ارجمندی ـ نشریه نوید آذربایجان ـ شماره ۵۲۶ ـ دوشنبه ۱۶ دی ۹۲
بیر نئچه ایل سونرا نه یاخچی بیزیم گؤزل اورمودا گلین دونونو اینینه گئیدی. ایندیسه ائله گؤزل اولوب، باخیشی ایله جان آلیر گل گؤره سن! قاداسی دوشسون قار گؤرمه میش مسئوللارین جانینا، هئچ اوتانمادان گلیب دئییرلر «ستاد ـ ی بحران» قورموشوق!
گؤروم «ستاد ـ ی رحمت» سیزلره غنیم اولسون! سیزین آپاردیغیز ایشلر اؤزو «بحران» دیر دا، بحران ـ ی نیله ییریک!؟
ائله بیری بو ایمام خیابانینین شوشه یه بنزر سال داشلاری، آمارلارا اساس باخین گؤرون بو نئچه گونو نئچه باش آدامین قیچی ـ قولو سینیب! بو یازیقلارین سوچو نه؟
هله منده بیلمه دن میللتین بابالینی یویوب دئییردیم: خدایا ـ خداوندا بو اورمو جاماعاتینین اوزونده نور ـ محمد قالماییب! گؤر نئجه جاوانلی ـ قوجالی، آداخلی ـ نیشانلی، اَر ـ آرواد هامیسی ایمام خیابانینین پییادا رولاریندا قول ـ بویون اولوب ژاپونو مدل یول گئدیرلر. دئمه جانیم شهرداری دؤشوین داشلارین اوزرینده آیاقلاری زوووب یول گئده بیلمه دن قول ـ قولا کئچیریب آستاجا آددیم آتیرلار، بلکه ییخیلب تپه سی اوسته یئره دَیمییه لر.
سیزده اؤزگه دئییلسیز، بیر نئچه گون بوندان قاباق ائله اؤزومده بؤیرو اوسته دَیدیم یئره هله لاب ژاپونو مدل آیاقلاریمی یئره سورته سورته یول گئدیردیم ها، بیلمیرم هانسی گؤزو چیخمیش نظرله دی بیله می، گاهدان بونا فیکیرلشیرم کی گؤره سن شهردارین اؤزوده ژاپونو یول گئده بیلر، ماشاا... چوخدا آغیر ـ سنگین دیر، آیاغی آتدا بوزبالتاسی دا اولسا، یقین کار سالماز بیله سینه! ائله بو رویالارلا آددیم آتیب ایمام خیابانینا ساری دؤندوکده بیر قوجا کیشی نین اوجادان قارغیشی بیله می دیسکیندیردی.
داش دوزن، داش آلتیندا یاتاسان! ـ بئلیم سیندی، آتایان لعنت داش ووران!
ویییی، الینی وئر الیمه قالخ آیاغا قوجا، سن کی بئله اورکدن قارغیش ائدیرسن، هئچ اولماسا دوزه ـ باشلی قارغیش ائله، داش دوزن فَهله بابانین بیری دیر، او نیله سین آخی. دئنن داش دوزن، سنه فرمان وئرنه لعنت! یازیق قوجا اَلی بئلینده اینگیلتی یه ـ اینگیلتی یه دوروب یولا دوشدو!
بیر آز کئچمه دن بو سفر قدیم شهربانی «میراث فرهنگی» ساختمانینین قاباغیندا دیک دابان چکمه گئین قیزلاردان بیری قیچی زوووب آز قالمیشدی دَیه یئره شانسدان اَل ـ آیاغ ائدیب ییخیلمادی، آما کئشکه بیر دیَردی یئره کئفینی خبر آلاردیم! بیلسینه دؤنوب دئمیشم: باجی هوشون باشیندا اولسون، زولاخ ـ زولاخ دوزولن ساری داشلارین اوستوایله گئدیب ـ گلسن آیاغین زوومز! او دیقه قایئدیب اوزومه دئییر: کور اؤزون سن با، سنه نه من نه سایاق یول گئدیرم!
نئجه کی شهرداری دئییر: سیزه نه من نه سایاق داش دوزورم، دوزنمه لی باشماق گئیین. شوشه یه تای بو باهالیقدا مرمر داشی کسیب دوزموشوک پییادارولارا اودا اللریز آغریماسین دیر! هله کئفیز چکسه توو چکیب موفته سینه اسکی ده گئده بیلرسیز!
ایندی ها دئنن، رحمتلیین اوغلو لوت کویرده، اصفهاندا ـ کاشاندا دوزن داشی گتیریب اورمونون یوللارینا دوشه مزلر. هله سیز بیلمیرسیز اورمونون شاختاسی وار، بورانی وار، قاری وار. قیرخ ـ اللی ایل بوندان قاباق دوزولن دیش ـ دیش قره داشلارا باخیب اؤیرنه بیلرسیز. اودا دوزدوغونوز داش دیر، بیر ایل اوستوندن کئچمه میش یئرلرینده اویناییب شاپبا ـ شوپ ائله ییرلر.
هله بو بوراسی، ایندی سیزه دئییم اورمونون دولموشلاریندان «اتوبوس» یوخسا فرهنگستان ـ ی زبان و ادب فارسی دئمیشکن «دراز خودروی زیاد آدم بر» لریندن!
قار یاغان گونلری کاسیبین بختی یاتان کیمی بو اتوبوس لاردا یاتیب یوخویا قالیر، کاسیب جاماعات دا سفیل ـ سرگردان خیابان قیراغیندا بوینولارین چیینلرینه قویوب، باهالی ماشینلاردا گردن چکیب ایله شن آداملارا باخیر بلکه اوره کلری رحمه گلیب بونلاری دا بیر یئردن گؤتوره لر، آما نییه گؤتورسونلر کی منده اولسام گؤتورمه رم!
او کی قالدی بارماق سایی بیر نئچه کؤهنه اتوبوس اولاجاق، بو اتوبوس شوفرلرینینده آللاهی وئریب، قارداشیم چیخ اوسته قوی یئرده قالماسینلار دئییب آدامی ـ آدام اوسته میندیره جکلر. نه وار نه یوخ بیر ایکی قیران آرتیق دخیل ائله سینلر.
محمدعلی ارجمندی (آيين شايين)