آیین شایین ـ 6

عشق ـ ائولنمک ـ آداقلی بازلیق ـ 18+ ـ ماه ـ ی عسل! و ...

محمدعلی ارجمندی ـ هفته نامه آغری ـ یکشنبه 21 خرداد 91 شماره 129

جانیم دئسین بو سفر ایسته ییرم عشق دن، ائولنمک دن، آداقلی بازلیقدان و ... یازیب دانیشام البته بیر آز آچیق آیدین دانیشاجاییق بونا گؤره ده یازی میز 18+ یاش اولاجاق، ایندی مندن دئمک، گؤزَتده یین بالا بولالار اوخوماسین. ایسته ییرسیز فیکیریز لاپ راحات اولا آیین شایین ستونون کسیب گؤتوره بیلرسیز. قالیب قولان صحیفه لرین کؤکو بیر قیرانا دَیمز!!!

بلی شاعیر دئییب: عشقدن محروم اولان انسانلیغا بیگانه دیر. آما رحمتلییین اوغلو بوراسین دئمه ییب: عشق دن کام آلان تاریخ بویو افسانه دیر. هر نمنه بو ائوی ییخیلمیش عشقدن باشلاییر!

گؤزون بیر قره گؤزلو دلبره ساتاشیب اوره یین گیزیلداییب چیرپینان زامان خانمان خراب اولماغین بیرینجی آددیمی دیر، داها بوندان بئله یه بیر آز هوشلو باشلی داورانماسان نهایت مجنونا تای دلی اولوب چؤللره دوشه بیلرسن. بوتون بو اولای لاری کندی من اؤزوم سوبای اولاراق یوخ ها! بلکه یوزده دوقسان دیگر سوبای یازارلاریمیز، اؤزللیکله باش یازاریمیزین داورانیشیندا گؤرموشم. اؤز آرامیزدا قالسین، چیخارتدیغینین ائله یاری پایین بو یولدا خشله ییب، سونوجودا اولماییب! نییه؟! سانکی اخلاقی یوخدور هامی نی سانجاییر.

ایندی سیزلرده قارداشیم، سئوگی یولوندا جان دئییب جان ائشیتمک لازیم. سئویرم سنی قره گیلَم دئمک لازیم. دئمه سن ایشین زار اولار مندن دئمک! صاباح بیریسی گون حیات یولداشیزلا یولا گئتمه ییب ایشیز عائله محکمه سینه چکسه ده، اوزاغا گئتمیرم بیزیم بو عباس زاده یه تای وکیل لرین آللاهی وئره جک، ایشیز بوشانماغا چکمه سه ده بو وکیل لر بئش اوچ قیراندان اؤترو سیزی بوشاندیرار! سونرادا گلیب بیر ستون آچیب یازاجاق لار «مشاوره حقوقی» بیر سامان آلتیندان سو یئریدن دیرلر ها گل گؤره سن.

هر حالدا عاغیلی آدام اودور، هئچ ائولنمه یه فیکیر وئرمه ییب! عومور بویو سوت گؤیلونده یاشایا، آما ائولنسه ده بوتون بو قایدالارا باغلی اولمالیدیر.

ایلک اؤنجه قاش گؤز آتیب یار قاداسین آلان زامان، اَلی اؤز جیبینه گئدیب بیرلیکده کافی شاپا گئتمکدن چکیلمه یه، گشت ـ ی ارشاد ایله اوز به اوز گلنده اؤزون ایتیرمه یه، سئوگی سینین سیم کارت شارژینی آلیب هدیه اولاراق بیر «وایمکس» ده پای وئره، گئجه لری شامی یئییب چوخ یوبانمادان بیلگی سایار باشیندا اَیله شیب «چَته» باشلایا، «وب کم» ده اولسا داها آرتیق باکیلاس اولار و اَن اساسی قونو دانیشیقلاریندا «جان» سؤزونو دیلدن سالیب اونوتمایا. البته بیر ایکی بند شعرده ازبرله ییب اوخوسا داها یاخچی اولار.

میثال اوچون صابیرین بو رمانتیک شعرین:

آی آلنین آی، اوزون گونش، آی قاشلاری کامان

جئیران گؤزون قاریشقا خطین، کاکولون ایلان

آلما چَنن، چَننده زنخدان، درین قویو

کیپریکلرین قامیش، دوداغین بال، تنین کتان

بوینون صراحی بوی بوخونون بیر اوجا چینار

اندامین آغ گوموش، یاناغین قیرمیزی اَنار

خالین اوزونده بوغدا، باشیندا ساچین غراب

قاه قاه ... غریبه گولمه لی سن خانمان خراب.

بلی غریبه گولمه لی سن خانمان خراب! گؤزونو آچیب یومونجا گؤره جکسن ایش کئچمه ده سئودییین قیزین مامان جانی! دئییر: قیزیمین کبینی، میلادی «مسیحی» تاریخ اوزه ره اولاجاق. اؤزونده «عندالمطالبه» یانی تئز اول تَرله گلسین!

بویور! یئنه هله فرصت وار، باشین الحد داشینا دَیسه قاییدا بیلرسن. یوخ آما دئیه سن قره گیله نین عشقی یامان بوغوب! اؤلدو وار دؤندو یوخدور. جانیم کبینی کیم وئریب کیم آلیب!

آللاه باشاجا گئدنلردن ائله سین . ایش لر یئرلی یئرینده مرتب گئدیب کبین کسیلندن سونرا، مشدی عیباد دئمیشکن آداقلی بازلیق زامانی گلیب چاتیر. یانی هفته نین یئددی گونوندن بئش گونون قایناتا قاپی سیندا اولاجاقسان، عزیز قوربان بایرامی بیر توخلو یا شیشک داوار آلیب قاپی لارینا گؤندره جکسن، خیاباندا سئوگیلندن قول قولا یاپیشیب بازارلیغا گئده جکسن، ...................... وای بو سانسور ائله ینین اَلی سینسین. یاخچی هله باشدا یازمیشام 18+ ها. آداقلی بازلیق دان شیرین نه اولار کی!؟ سئوگی ـ محبت آدی گلنده دیسکینیرلر، آخیریدا بئله اولار دا، خیاباندا بیر نفره چکیل اویانا دئمک اولمور هامی قان ـ قان دئییر، بوتون جاوانلار سفیل سرگردان، ایشسیز ـ ائوسیز کوچه لرده سرگردان دیرلار.

هر حالدا آداخلی بازلیق نه قدر ده دادلی اولسادا، نیشانلی لیق چوخ اوزون سورمه مه لی دیر. قدیمدن دئییب لر: کاروانسارانین آغزین باغلاماق اولسادا جاماعاتین آغزین باغلاماق اولماز.

او کی قالدی. توی تؤره نی و بال آی عنعنه سی دیر. ماه ـ ی عسل یازیم بیسوادلاردا قانسین! قالیب اؤ کئفیزه، ائویزی ایلک آخشامدان ییخماق ایسته ییرسیز حنا گئجه توتون! یوخ آما کئفه باخماق ایسته ییرسیز چمدان لاری باغلاییب، یانیزا یئنگه قوشمادان بیر نئچه گون اجنَوی اؤلکه لرین دنیز قیراغی قومساللارینا نه بیلیم، اندونزی نین باله سینه، قناری آدالارینا و ... یوخ ها، بلکه اورمونون آدالارینا گلیب چالدیرا بیلرسیز. اؤزونده ایندی چوخ اوجوز باشا گلر. ائله یولو قاتیب قاباغیزا پیادا دا گئده بیلرسیز، لازیم اولان بیر ایکی قاب ایچمه لی سودور اونودا گیزلینجه آپارماق اولار. گؤلون کیفیر لجن لری ایتیب گئتسه ده داها یاخچی! ایندی آغ آپپاق دوز بالتالارینین اوستونده اوزانیب گونش حامامی آلارکن جان دئییب جان ائشیده بیلرسینیز.

آللاه یاخچی یول وئرسین. یئنی حیات شادلیق ایلا.یازار: محمدعلی ارجمندی ـ هفته نامه آغری ـ یکشنبه 21 خرداد 91 شماره 129