آیین شایین ـ 18

ژورنالیست لر ویترینی ـ یئل اَسدیکجه اَسن ژورنالیست لر ـ فرهنگ و ادب آل وئرچیلری ـ کور توتدوغون بوراخماز ژورنالیست لر ـ آسیلمیش ژورنالیست لر و ....

شماره جدید نشریه آغری ـ هفته نامه آغری

محمدعلی ارجمندی ـ نشریه آغری ـ یکشنبه 13 اسفند 91 شماره 141  

بیر نئچه گون بوندان اؤنجه سایین دوستوم، گرگرلی آراز «برزگر» جنابلارینین «کئفلی ایسکندر» آدلی بلوقوندا دادلی ـ دوزلو بیر یازی یا راستلاشدیم. برزگر معللیم، قیلی قاتیقدان سئچه رک سون سطیرده یازیب سورموشدو؟

«بیر پَخله یئیه ـ ن ژورنالیست، گؤره سن بیزیم دوره ده، نه یازا بیلر!؟»

برزگر معللیمین سوالینا یانیت اولاراق یازدیم: منجه، ژورنالیست لرین یازیب ـ یازمادیغی قونولار یئدیکلری پَخله دن آسیلی دیر. یانی قالیب هانسی پَخله دن یئیه لر! دادلی ـ دوزلو رستوران پَخله سی یئسه لر، سوبا قیراغیندا بیر بالاجا اَسنه ییب تام حقیقتی یازاجاق لار! یوخسا اَل آراباسی اوسته پیشمیش پَخله دن یئسه لر، ائله بللی دیر منه تای هادارام ـ پادارام یازاجاقلار!

بو کیچیک باشلانیش ایلا بو سفر موختلیف ژورنالیست لرین قاپیسینا گئدیب بیرلیکده قاپیلارین دؤیوب قیساجا بیر تانیتیم یاپاجاییق. اولا بیلسین بو یولچولوقدا، دمیر قاپیلارین بیزیم اوزوموزه آچماییب هله یامان ـ یاووز دا ائشیدَک. آما هر حالدا گؤره ویمیزی یئرینه یئتیرمه لیییک و بو یولدا نه یاخچی ایلک اؤنجه جهان وطن ژورنالیست لردن باشلایاق.

«جهان وطن ژورنالیست لر» بو سایاق ژورنالیست لر، چوخ قانی ایستی و قوناق پرور اولاراق هامی نی باغرینا باسیب گولومسه ییب اؤپَرلر. آما بیلمیرم نه دن آیین شایین ـ ی گؤرنده هویوخوب دمیر قاپینی اوزومه چیرپیرلار. بونلار اوچون دوشنبه ده بیر پیشیک اؤلسه بئله پئرزیدنت رحمانین اوغلو روستمه باش ساغلیغی گؤنده ریب سون پیشییین اولسون دئییرلر.

آما قولاقلارینین دیبینده بو بؤیوکلوکده اورمو گؤلونون دورنالاری ـ جئیرانلاری جان وئریب اؤلدوکده، آکیشی سیاست دونیاسینا قاریشما دئیه آستاجا واز کئچیرلر. جهان وطن لر دونیانی بیر کند آدلاندیراراق یئری گلدیکده گئن تومانلار ایلا قول ـ قولا کئچیریب جلمان دا گئدرلر. جهان وطن لر چوخ یوخاری دوشونجه یه مالیک دیرلر و رستوران پَخله سیندن باشقا هئچ بیر پَخله نی دیللرینه وورمازلار!

«آسیلمیش یوخسا آسیمیله ژورنالیست لر» آسیلمیشلار نئجه کی اسامی لرین مشاهده ائله ییریک، بسیار هوشمند و فهیم دیرلر و همیشه اساسی موضوع لارا فَکیر می کنند. بو قبیل ژورنالیست لر همیشه لارج اولوب لارج دوشونرلر. یانی اؤز دهات لاریندا دانیشان لهجه نی! فراموش ائله ییب. بزرگ شهرلرده چوخ قشنگ و رومانتیک بیر «آنلار» می بخشید «لحظه لر» کئچیریرلر.

آسیلمیش یا همن «آره» دئین ژورنالیست لر، جلسه لرده تمامی سعی لرین ائله ییرلر خدای نکرده لهجه لری اوزه چیخیب خَجل اولماسینلار. نوشته لری ده همیشه سرشار از امید، شفاف و عظیم اولار. همشهری لرین آگاه ائتمک اوچون، گؤل اوستو مئیدانین «سرگل» و بازار آغزینی «سربازار» یازیب تلفظ ائله ییرلر.

«شوهرت باز ژورنالیست لر» بئلنچی ژورنالیست لری ده گؤرمک ایسته سز، چؤله چیخماق لازیم دئییل. ائله بیزیم بو آغری ـ یا مشتری گؤزایله نظر سالساز الیزه حساب گلر، بولونا ـ سالینا، یازیچیلار شوراسی ـ ساده یازار، آغری یازاری ـ ایمئیل مکتوب یازاری، جانشین و .... بو بیر تیکه نی ده آتدیم ایندی آللاه بیلیر سوروملو مدیر هابئله باش یازارین و ... اَل آلتی سانسوردان چیخاجاق یوخسا یوخ!

دئنن آخی نه فرقی وار! یازاری یازیسیلا تانییاجاق لار یوخسا فخری سانیلا. بیز کی پخیل دئییلیک آما ایندی کی بئله اولدو گلن سایی دان منیمده آدیم اولاجاق دوهتور آیین ـ شایین!!!

«کور توتدوغون بوراخماز ژورنالیست لر» آمان آمان بو سایاق ژورنالیست لرین اَلیندن، بیر سؤزو مین کره قایتاریب آداما دئمه یینجه اَل چکمزلر. اوخوجونو آنلاماز دوشونوب. گرک من دوشونه نی دوشونوب دئیه گونو ـ گوندن آرتیق تاپشیریق وئره جک لر. کور توتدوغون بوراخماز ژورنالیست لر ایللر بویو مدنیتین تام گؤبه یینده یاشاسالاردا باشقا هئچ بیر زادی گؤروب دوشونمه یه جک لر. اوستاد شهریار دئمیشکن:

مدنیت دَبین ائیلیر بدَویت، بیر اوسانمیر

گون گئدیر آز قالا باتسین، گئجه سیندن بیر اویانمیر

بو سایاق ژورنالیست لر جنگاور اولاراق قلم لری ایله هامی نی کسیب ـ بیچمک ایسته ییرلر. گلمه میشدن منده قاچیم!ًً

«یئل اَسدیکجه اَسن ژورنالیست لر» بو ژورنالیست لرین مفکوره سینده میثقالجا دوشونجه و اینام اولمادان ساده جه ژورنالیست لرین اَداسین چیخاریب، بهره سین آپاریرلار.

بو سایاق آداملار ـ وکیل لر ـ آغالار، ایلک اؤنجه باققال توکانیندان بیر ایکی درگی مجوزی آلاراق اؤزلرین سوروملو مدیر تانیتدیریب، یئره ـ گؤیه ژورنالیست آدییلا فخر ساتیرلار. و چوخلو سیاستچیلره تای کی گؤرورسن داردا قالاندا، کیلاس اوچون من ساده جه بیر معللیمم دئییرلر، بونلاردا من ساده جه بیر ژورنالیست ـ م دئییب، اؤزلرین ایروسوای دو جهان ائدیرلر.

بو سایاق فرهنگ و ادب آل ـ وئرچیلری، بیر نئچه یازاری دا اله آلیب، تاپشیریق وئریب اوندان ـ بوندان اینتقام آلاجاقلار.

بئلنچی بیر ژورنالیست لر یوخسا وکیل لر و ... ایلدن ـ ایله، آیدان ـ آیا، گوندن ـ گونه رنگ دَییشیب یازیب پوزاجاقلار. کیمسه اونلارا پول وئریب گولومسه سه یاخچی آدام اولاجاق، کیمسه حق دئییب باش اَیمسه پیس آدام. محمدعلی ارجمندی ـ نشریه آغری ـ یکشنبه 13 اسفند 91 شماره 141