آیین شایین ـ ۱۶

بوس ـ همن اؤپوشو خاطیرلادیر ـ بی ادب و تهاجم فرهنگی سؤزلر ـ ملیکا بورایا گل ـ آغری نین ادبلی ارکانلی قیزلاری ـ دراز خودورو زیاد آدم بَر ـ حقوق آدمیت و ...

محمدعلی ارجمندی ـ نشریه آغری ـ یکشنبه 1 بهمن 91 شماره 139

اتوبوس! بو آدی ائشیدیب گؤرنده نه یی دوشونورسوز؟ آستاجا یئرییَن بؤیوک بیر توسباغانی، آدام دخیلین، جهنم عذابین، قدیم چؤرک خانا سیراسین یوخسا محصیل لرین بیر ـ بیرینه، قاش گؤز آتماسین!

اتوبوس آدی و شکیلی منیم اوچون بونلاری خاطیرلاتسادا، بعضی رومانتیک آداملارا بوس ـ همن اؤپوشو خاطیرلادیر، ائله بونا گؤره ده فرهنگستان زبان و ادب، بی ادب و تهاجم فرهنگی سؤزلرین! قارشینی آلیب ییغیشدیرماق اوچون «اوتو ...» آدی یئرینه «دراز خودرو زیاد آدم بَر» سؤزونو نظرده آلیب تاپشیریق وئریر.

منجه فرهنگستانین بو سایاق ایشلری گوجلو آلقیشلارا لاییق دیر و یئری گلدیکده خط ـ ی واحد مسئولاری دا، اتوبوووووس لاردا، توبه استغفراا... «دراز خودرولاردا» بیر پارا تمیز ایشلر آپارمالیدیرلار.

نمنه!؟ یانی دراز خودرولارین اورتاسینا بیر پرده چکیب کیشی لر ایله خانیم لاری بیر ـ بیریندن آییرالار! بئله اولسا گؤزلر آسیلی قالمامازلیقدان علاوه نهایت یازیق کیشی لرین خئییرینه باشا چاتار!

شخص ـ ی خود ـ ی من!!! بو خط ـ ی واحدلرده بیر نئچه یول اوزده قالیب یئریمی خانیم لارا وئرمیشم. گؤرورسن دراز خودرونون دال طرفی دولوب هجوم گتیریرلر بو تایا. اونودا هله ـ م یاشلی خانیم یوخسا اوشاقلی خانیم اولا کی اؤزوم کؤنوللو اولاراق آیاغا قالخیب یئریمی اونلارا وئررم.

سؤز بوراسیندادیر، باخیسان قشنگ بیر گنج خانیم یئتیریب دئییر:

آغااا می بخشید! بی زحمت اولار سیز بیر صندلی گئده سیز قاباغا!

ـ دوروب گئتمه ییم، نئیله ییم، ائله سالمیر دیلینه کی!

بیر آز کئچمه دن گؤروسن یولداشین دا سسله ییب دئییر: ملیکا بورایا گل یئر وار!

من ها گؤز دولاندیریب باخیرام بوش صندل گؤرمه ییرم. باخین آرتیق تاماهلیغا، ملیکانی دا چاغیریر یانینا، باخا گؤره بیر یولداشینا دا یئر آییرا بیلیر یا یوخ! دئییرسیز بلکه هامی قیزلار آغری درگی سینین قیزلاری تک ادبلی ـ ارکانلی دیرلار.

بو سفر آما باشیم اوسته ملیکا یوخ مَلک ده اولسا قورخا ـ قورخا صندلیمده اَیله شیرم.

خط ـ ی واحدلره ده پرده چکیب آییرسالار داها یاخچی، هامیمیزا قازانج دیر! هر حالدا بو گونلر قیز ـ اوغلان آییرما یاساسی جاماعات آراسیندا رادیو ـ تلویزیوندا، قازئت لرده سؤز قونوسو اولسا بئله، نه دن بیزلر بو ایشی آغری دا باشلامایاق!

ائله بونا گؤره ده کئچن گونلرده سوروملو مدیریمیز هابئله باش یازاریمیز دلی قانلی موهندیس علی بَی ایله اوتوروب بو قرارا گلمیشیک اورمونون بؤیوک بازاریندان بیر نئچه مئتر نارین گوللو قیرمیزی چیت پارچا آلیب، ارشاد دئمه میشدن قاباق اؤزوموز آغری دفترین اورتاسینا پَرده چکیب ایکی یه بؤله ـ ک.

البته بونا امینم کی درگی نین قیزلاری دا بو ایشده یاردیم ائدیب، پارچانی چوخ سَلقه لی اولاراق بیچیب تیکه جک لر. آللاه ساخلاسین هامی سی هوشلو ـ باشلی جووان اَزن دیرلر.

آغری دا بو ایش تئزلیکله باش توتسا چوخلو شئی لر نظمه گله جک. ایلک اؤنجه بیزیم بو قارا چوخا امیر در گی قیزلاری ایله بیرلیکده، «قورخودان بو قیزلاردان آد آپارماق دا اولمور کی» بیر آز دانیشیق دان اَللری اولوب اؤز ایشلرینه یئتیره جک لر.

داها اؤنملی سی بو ایش سرانجام تاپسا، بلکه بو آغری دا چالیشان قیزلار بیربالاجا اوتانیب، هئچ اولماسا، یازار خانیم لار قوناق گلدیکده، من و عم اوغلو دفترین قیزلاری عوضیندن مژمئیی ایچینده نارنگی ـ پرتقال گتیریب خَجل اولمایاق! هله اؤز امکداشیمیز اؤزگه دئییل، باخ گؤر اونون یانیندا گلن یولداشلاری آداما نه دئیَر.

هر حالدا مکتبلردن توتدو اونیورسیته لره، تاکسی لاردان اوتوبوس لارا دک قیزلاری ـ اوغلانلاری اَلک ـ قلبیردن کئچیرتمه لیییک. نه اویاری وار اَرکک ـ دیشی بیر یئره توپلانیب بیر سایاق علمی کیتابلار اوخویالار. ائله بئله اولوب ایندی بیر چنگه اوشاقلار حقوق ـ ی آدمیت دن و پیس ـ پیس سؤزلردن دینیب دانیشیرلار. محمدعلی ارجمندی ـ نشریه آغری ـ یکشنبه 1 بهمن 91 شماره 139