آیین شایین ـ 17

آیین شایین ـ کاریکاتور: زیبا کریمی

منیم کیشیمین یوز مین دَیَری دیر ـ  ولنتاین یوخسا ولی نین تویو ـ خومار باخیشلی گؤزلر ـ آنلاین و آفلاین سئوگی و ...

محمدعلی ارجمندی ـ نشریه آغری ـ دوشنبه 23 بهمن 91 شماره 140 ـ  کاریکاتور: زیبا کریمی   

ـ الو آغری دیر؟

ـ بلی، بویورون؟!

ـ آیین سنسن، بیر باخ گؤر نه دئییرم. گتیریب منیم پولومو وئرمه سن، بیله یین ایروسوای دو جهان ائده جه یم. منیم کیشیمین یوزمین دَیَری دیر! یا پول وئر یادا کیشینی قایتار! باشقا یولون یوخ آرتیق!

ـ ظالیم نییه نه خبر دیر؟! مگر آنجلینا جولینین کاریکاتورون چکیب سن یوز مین تومن اولا؟!

ـ سؤزو بوروشدورما، آنجاق باشین اوستونده کی کیشی، سنین کودک ـ ی درون ـ ون دور!!! اونو چکینجه چوخلو زحمت چکمیشم، یوز مین تومن وئریسن یوخسا ایرشادا شیکایه آپاریم.

ـ آخی اینصافسیز بیر دَیقه ماجال وئر گؤر نه دئییرم.

تلفن: دووود ـ دووود ـ دووود ...

ایتگین قبرین نورلا دولسون فردوسی، ائله یاخچی دئییب سن:

مکن هیچ کاری بفرمان زن ـ که هرگز نبینی زنی رای زن!!!

آنادان اَمدیییمیز سوت بورنوموزدان گلدی! اؤز امکداشیمیز بئله ائدنده باخ گؤر اؤزگه لر آدامی دال ـ دالی دووارا چیخاردار یا یوخ!؟

هله آللاه کریم دیر. بورجلاریمیزی دا تاپیب وئره جه ییک. کئچن سایی خاطیریزدا اولموش اولسا، فرهنگستان ـ ی ادب، هابئله بوس ـ ا تای بی ادب سؤزلردن صوحبت ائله دیک. بئلنچی بی ادب سؤزلرین آردی اولاراق بو سفر «ولنتاین» ـ یادا عمی اوغلوم دئمیشکن، «ولی نین تویو!» ـ دان دینیب دانیشاجاییق. دئمک سئوگیلی لر گونوندن اَن یاخچی سی آداخلی لار گونوندن. آداخلی سؤزون قوللانماق داها یاخچی دوشر. یانی سؤز ـ ساو یئری قالمادان علاوه، قیز ـ اوغلان خیاواندا قول ـ قولا یاپیشیب گئدنده گشت ـ ی ایرشاد دا گؤزون یوموب واز کئچر.

البته سئوگی سولطانی اوستاد شهریارین شعرین نظرده آلاراق: گشت ـ ی ایرشاد:

بیر اوغلان، بیر قیز گؤردون ـ بیر آی بیر اولدوز گؤردون

اؤز عشقین یادا گلسین ـ آغزین بیر دادا گلسین

هر حالدا بو گونلر چوخلو رومانتیک صحنه لر گؤرمک اولار. ساده جه دیقت ائدیب خومار باخیشلی گؤزلری سئچمک لازیم! بوتیک لر قارشیندا دایانیب، قیپ ـ قیرمیزی ساختا اورَک لره گؤز تیکن ایشسیز ـ آرسیز جاوانلاری، تاپدالانمیش آرزی ـ دیلک لری! هابئله خولیالار شهرینده آددیم آتان ملَک لری گؤرمک اولار.

ولنتاینین آدی و یادی اوچونجو عصیرده یاشایان مستر ولنتاین دان و اونون سئودییی کور بیر قیزا یازدیغیfrom your valentine  آدلی مکتوب ایله قالیب، ولنتاین دارا چکیلسه بئله، ایندیلیکده آلوولو عشق لرین نیشانی ساییلیر.

آلوولو عشق دئمک ده، اصلی ـ کرم ـ ه تای عشق آتشی ایله یانیب کوله دونن سئوگی دئییل. بلکه فیس بوک و چت روم آتشی ایله جان دئییب جان ائشیدن سئوگی دیر.

بو سایاق سئوگی لر قیسا بیر زاماندا آنلاین اولوب آفلاین باشا چاتار. یانی اَل بَهیم سو ایچیمجه تفاهم یارانیب، دویغولار جوشوب داشیر:

خیالیم بویلانیر دامدان، دوواردان

باشیمدا یار باغین گزمک هاواسی

قاپی لار باغلی دیر یول تاپیم هاردان!؟ «1»

اوزون زامان سورمه دن، باغلی قاپیلار بیر به بیر آچیلیب، عشق آتشی ایله یانان زمانه اصلی ـ کرم لری آب ـ ی حیات باشیندا بیر ـ بیرینه چاتیرلار. گؤز اوینادان منظره لر گؤزوموز اؤنونده، رسام رسمینی چک ـ شاعیر وصفینی یاز:

آی آلنین آی، اوزون گونش، ای قاشلاری کامان

جئیران گؤزون، قاریشقا خطین، کاکلون ایلان

آلما چَنه ـ ن، چَنه ـ نده زنخدان، درین قویو

کیپریکلرین قمیش، دوداغین بال، تنین کتان

بوینون صرافی، بوی ـ بوخونون بیر اوجا چینار

اندامین آغ گوموش، یاناغین قیرمیزی اَنار «2»

آب حیات باشیندا ایله شیب، بیر لیوان قیرمیزی اَنار سویو ایچینجه سو ـ ی تفاهم لر یارانیب، نار سویو یئره جالانیر. بو یانی سئوگی آفلاین اولوب باشا چاتدی! گؤزَتده یین ایش بورا چاتماسین. بونلار هامیسی گونوموزون ایستک لری دیر. ولنتاین اولا یوخسا سونای، ساده جه بیر باهانا دیر شاد یاشاییب، اینسانلاری خوشبخت گؤرمک اوچون. یاشاییشینیز شادلیقلارلا دولو اولسون. هله لیک!

اتک یازی: 1ـ بولوت قره چورلو 2 ـ صابیر. محمدعلی ارجمندی ـ نشریه آغری ـ دوشنبه 23 بهمن 91 شماره 140 ـ  کاریکاتور: زیبا کریمی