آیین شایین 23 ـ فیندیق بورون گؤزَللر
آیین شایین 23
«فیندیق بورون گؤزَللر»
محمدعلی ارجمندی ـ نشریه نوید آذربایجان ـ شماره 519 ـ چهارشنبه 13 شهریور 92
بیر مثل وار قدیمدن دئیرلر، بیری اؤزو گؤزل اولماسا گؤزل اینسانلاری گؤرمه یه گؤزو چکمز. بیلمیرم ایندی منیمده حال و حیکایه ـ م بئله دی یا یوخ، گؤزوم چکمیر بعضی گؤزللری گؤرم. آما آدام اؤله جک، حقیقی گؤزللری سئورم یانی من یوخ ائله اینسان ذاتا گؤزللییی سئور.
آما سؤز بوراسی،هانسی گؤزل!؟
قاش ـ گؤزونو یولوب، تاتو چکیب بورنونو توخماقا وئرن گؤزل یوخسا آللاه وئرگیسی یاراشیقلی بیر گؤزل!؟
سؤز قونوسو بیر نئچه گون اؤنجه آنام گلیب بیله مه موشتولوق وئردی کی خالا قیزین ملیکا بورنونو وئریب اوستونده گؤزللیک عملیاتی آپارالار، یانی فیندیق بورون اولا! آخشامی تئز گل گئده جه ییک بیر کئفین خبر آلاق، حئیوان قیز ایندی بیر یول بورنوندان نفس آلانمیر.
پئیییییی، قادانی آلیم آنا، ائله دئدین من دئدیم ایندی گؤره سن ملیکانین او چیرپینان اوره یینده کی شاه دامارا پیوند ووروبلار! چوخ دا بئله خوشوم گلیر بیله سیندن. دئیه سن فیلین بورنوندان دوشوب!
هله اوزاغا گئتمیرم من بیله سی ائله منیم بو باکیلاس آدلی خالاقیزیم دوز دئسه، 6 دنه میلیون تومن پولو وئریب قوندارما بیر دوهتوره نیله یه، بورنونون باشینی بیر آز چکه اوسته کی شوکورلر اولسون تانری درگاهینا قاشین آلماق عوضینه ووروب گؤزون چیخاردیب. ایندی آدام اوزلو نفسده چکنمیر!
آخی بیری یوخدو دئیه قادانی آلیم آدی گؤزل خالاقیزی، نییه باش تاپمیسان، بورونا عمل ائتمک ایله تورشو کوپه سیندن چیخماق اولماز، بورنویون یئرینه او دیل آجیلیغییان فیکیر وئرسه ایدین ایندی کئفه تپیک آتیردین!
بو زامانادا بیزیم قیزلارین ناز و ایفاده سین کیم چکه بیلر، یوزه دوقسان فایزی بورنولارین کسیب قالیب قولان اون فایزی دا هئچ اولماسا بیر بارماق چسبی تاپیب بورنولارینا یاپشدیریب لار. نییه چون مد دور، گؤزللیک دیر. البته هامیسینی دئمیرم ها! یوخسا ائله صاباح ـ بیریسی گون درگیمیزده آدلاری گلن قیز امکداشلاریم منیم دَریمه سامان تپرلر!
اصلا نییه اوغلانلاردان سؤز آچمایاق، بوگون صاباح پاییز گلیر دانیشگاهلارا بیر نظر سالین. او تای بو تای دان گلن کؤچری گئن تومان اوغلانلار گاهدان گؤروسن ائله قاشلارین آلیب اوزلرینه ساپ سالیرلار کی من اؤزوم دئییرم یئر آچیلسین گیریم یئره، هره سینین ده بوینوندا میترا ـ فروهر آدلی بیر فساد نوقطاسی.
مشهدی عیباد دئمیشکن: آدام بیر یول خجالتدیک چکیر، توبه استغفراا...
شوکورلر اولسون ایران آدلی اؤلکه میز بیرینجی لر مکانی دیر، دونیالیق آمارلارا بیر قیسا نطر سالساق هر نه آچیق ـ آیدین بللی دیر.
ـ بورون و دَری گؤزللیک عملیاتی اوزره دونیادا بیرینجی یئری آلیریق.
ـ چوخلو سایدا گونو گوندن آرتیق، «لیپو ساکشن» عملیاتی ائدیب ورزشه احتیاج اولمادان ایضافه کیلولاریمیزی کسیب آتیریق.
ـ و هابئله الوان ـ الوان بَزک وسایلی ایشلتمکده دونیا اوزره یئنه بیرینجی یئره مالیک اولموشوق.
ـ البته یاخین گلجکده داها چوخ ایره لی سوره جه ییک، یانی بوتون سرحدلری آشاراق، ایلده بیر یول دوداقلاریمیزا و صوراتلاریمیزا «بوتاکس ژلی» تزریق ائده جه ییک.
بوتون بونلارا نه دئمک اولار، توپلومون روح سال خسته لییندن علاوه. بیری قادین اولاراق قادین حاقلارینا گؤز یوموب و ساده جه ساختا بیر آدام اولماق ایسته ییر و بیری کیشی اولاراق دوشونمه دن قادین اینجه لیک لرینه صاحاب اولماق ایسته ییر.
و سوندا، او کی قالدی اصیل گؤزللرین وصفینی رحمتلیک صابیرین شعرینده گؤروب اوخوماق.
آی آلنین آی، اوزون گونش، ای قاشلاری کامان
جئیران گؤزون، قاریشقا خطین، کاکلون ایلان
آلما چَنه ـ ن، چَنه ـ نده زنخدان، درین قویو
کیپریکلرین قمیش، دوداغین بال، تنین کتان
بوینون صرافی، بوی ـ بوخونون بیر اوجا چینار
اندامین آغ گوموش، یاناغین قیرمیزی اَنار
محمدعلی ارجمندی (آيين شايين)