«آیین شایین»

مادمازل اولکر اوجقار

روزنامه مهد تمدن - صفحه سانجاق - شماره 414 - چهارشنبه 96/11/11 

يای اولا یوخسا قیش ایکی اَلی همه شه جیبلرینده اولار، دئیه سن تبریزین سویوغونو یالنیز اولکره پای وئریبلر. بیلمیرم بلکه ده مد و یا عادت اولاراق بئله دولانیر! نئجه کی عادت اوزره هر گون آخشام چاغلاری دوه چی یولوندا آددیم آتیب پاریس شعرینی اوخویوردو؛

ساچلاریمی پاریسه ساری هؤرمه دیم بو سحر

گوونجیم قالمادی دوغروسو

قالمادی آرتیق ـ پاریس!

اؤزو دئمیشکن یاشام فانتزیلریندن بیری شعر اوخوماق و اونو یقین قاری ننه سیندن بورج آلمیش! تبریز گؤزه لی پاریس شعرینی ائله احساس ایله اوخویوب رویالارا دالیردی گل گؤره سن. ائله کی اونو اوزاقدان رویت ائدن هر کیمسه اولورسا اولسون، مادمازل اولکر گلیر دئیه اَل ـ آیاغینی ایتیریب پئشوازینا چیخاردی.

چانتاسینی بیر یانلی سالیب، لاب بئله شاعیرلره تای آستاجا آددیم آتیردی، گاهدان دا بیر گولومسه یه رک معنالی گؤزلری ایله، ایلدیر ـ ایلدیر باخیب سانکی بوتون دوه چی قیزلارینا یاندی ـ قیندی وئریردی! کوچه لرینه چاتمامیش، قوشباز عسگرین آغ گؤیرچینلری اولکره یول گؤستریجی اولاردی. یول بویو باشینی قاوزاییب گؤیرچینلره باخارکن، شهریار شعرینی دیله گتیرردی:

آغ گؤیرچین، آغ قانادین آچارسان ـ دام ـ دوواردان بیر قووزانیب اوچارسان ـ اولدوزلانیب «پاریس»! دئیه قاچارسان ...

اولکر نه اندازه هوشلو ـ باشلی اولوب، بویا ـ باشا چاتسادا آنجاق کودک ـ ی درونو کؤرپه بیر اوشاغا تای صاف ـ ساده دیر! ائله اونا گؤره، گونو بو گونده بالاجا خوخان ایله شیرین آنلار یاشاییر! بیر ایل اؤنجه یازدیغی سندلی مکتوبدا دا بونا ایشاره ائدیر: «سئوینیرم. خوخان یاواش ـ یاواشا یئرینی آلماقدادیر، بلکه اینانمایاسیز آما سنه بیر سؤز دئییم آیین شایین، اؤز آرامیزدا قالسین، خوخان ناغیللاری یوزده دوقسان منیم اوشاقلیق خاطیره لریمیدیر کی بالاجا ده ییشیکلرله خوخانین آغزینا قویورام»!!!

هر حالدا اولکر اوجقار، گئجه ـ گوندوز ایللر بویو فرانسا عشق ایله یاشاییب، یازیب ـ اوخوسادا سونوندا مرادین وصلینه چاتدی و دوکتورا مقطعسینده تحصیلاتین بیتیرمک اوچون فرانس اؤلکه سینین «گرونوبل» شهرینه ساری یوللاندی. آما سؤز قونوسو،  فرانسایا گئتدیکدن سونرا داها رومانتیک احوال ـ روحیه یه صاحاب اولوب، دئمک ایش اورا چاتیب،  گئجه لری تبریزدن آپاردیغی باش یاستیغینی قوجاقلایبب سربست شعر دئییر:

قیرمیزی نارین گوللو یاستیغیمی، تبریزه ساری قویمادیم بو گئجه

گوونجیم قالمادی دوغروسو

قالمادی آرتیق

سیزین اوردا گئجه لر

بیزیمکیلردن داها یوموشاق

داها کؤورک، داها آشیری!

شعری یاریمچیلیق اوخویوب سونرادا ایچین چکیب آغلایاراق، گؤز یاشلاری ایله یاستیغینین ساتین آلیر!

ایندی ها دئنن، واللاه ـ بیللاه اولکر جانی، بیزیم گئجه لرده ظولمتدن ساوای هئچ نه یوخدور. ایل ـ ایلدن پیس گلیر، بو ایلده قیش لاب تئز دوشوب، قورو سویوق آدامی بیر یول کسیر! آتالار دئمیشکن آغ گون آدامی آغاردار ـ قره گون قارالدار. یئری گلمیشکن کئفه تپیک آتیرسان. تانری دان داها نه ایسته ییرسن آخی!؟

آما قبول ائله مز ، بیلیرم! گؤره سن آناسی بو قیزین تیکه سین کیمدن یئییب، عنادکارلیقدا اصیل دوه چی روحیه سی وار. لاب بئله میرهاشما تای!

گئجه لری اوره یی کؤوره لیب آغلاماقدا، گونوزلریده، همه شه الینه بیر نئچه بوتا قیرمیزی گول آلیب «مونپارناس» یوخسا «پرلاشز» دا اوژن یونسکو وغلامحسین ساعدی یه تای آدلیملارین باش داشینی آختاریر. اورا گئتسه ده طاهره دن سؤز آچیب دانیشاجاق! دوغروسو دئیه سن جنت قوشو اولوب! یار ـ یولداشیدا دئییر بلکه ایندی پاریس قیزلاری ایله بیرگه کریسمس آخشامی برج ـ ی ایفئلَه ایپ آتیب کیفلان گئدیرلر!

یوخ جانیم، اولکر داها سیز گؤرن اولکر دئییل. کیم نه دئییر قوی دئسین! ایندیسه مادمازل اولکر اوجقار گرونوبل فاکولته سینین سینین بارماق سایی نخبه اؤیرنجی لریندن ساییلیر. بوتون سمینارلاردا اوستاجاسینا ائله گردن چکیب، دینیب ـ دانیشیر سانکی فرانسیز بولبولودور!

اولکر اوجقار دویغولاری ایله باریشا بیلسه، یقین «مون بلان» داغینیدا فتح ائده بیلر. بو یولدا اونا باشاریلار.