آیین شایین ـ 13

باکیلاس ژورنالیست لر ـ ساری جئیرانلار قوجا جئیرانلار

با کیلاس ژورنالیست لر، ساری جئیرانلار، قوجا جئیرانلار

«محمدعلی ارجمندی ـ نشریه آغری ـ یکشنبه 21 آبان 91 شماره 136»  و «نشریه شهامت شماره 18»

مخبیرلیک «خبرنگاری» یوخسا با کیلاس دانیشسام ژورنالیست ایشی دونیانین اَن چَتین و قورخونج ایش لریندن ساییلیر. ایللاه بو غربی آذربایجان اوستانیندا، آیدا ـ ایلده بیر یول بیر ایداره نین قاپیسین آچیسان دئیه سن اژدرها گؤروب لر هره بیر بوجاغا قاچیر. هامیسی گؤز آلتی گیزلینجه سنه باخیر. هله اؤزلری چاغیرسادا قاپی دان کئچمه میش گؤرورسن بیری کاغاز اَلینده یئتیردی:سلام ـ آدیزی، فامئلیزی، موبایل نومره سی، آدرسی، نشریه نین آدین دوزوب کاغاز اوستونه دئیه سن موفتتیش دیر گلیب تفتیشه! هله اوتانیب خجالت لیک چکمه سه لر قاباقجادا مخبیرین ذهنینده اولان سورولاری دا سوروشارلار!

دئدیم خانیم ـ ی روابط عمومی! کؤینه ییم ده xxl دیر دئییرسیز اونودا یازیم؟

ـ نه، بو نه فرمایش دیر بویوروسوز، فقط بیر سئری هدایامیز وار محضریزه تقدیم ائلییه جه ییک! دئدیم تعداد موجود اولسون!

هدایادا! دئینده آغیز بالا باتیر. بیر آی قاباقجادان دفتره فکس آچیب هامی یا موشتولوق وئریب، ائل عالمه یاییبلار دئییه سن صغیر اوشاغا پای وئریرلر. اونودا نمنه، بیر سینیق رادیو ایله ایسته ییرلر مخبیرلری خام ائله ییب اورَک لرین اَله گتیره لر سورویا یئتَرینجه بیله لرین سیخما ـ بوغمایا سالمایاسان.

آللاهدان گیزلی دئییل سیزدن نه گیزلین، بیزیم مخبیرلرینده چوخوسونو آللاه ووروب! گؤره سن بعضی لری باشدان ـ باشا بئله بیر سورو دیله گتیریب سوروشمازلار. واختی گودَرلر دوروب قاچالار. بیر نئچه سی ده گؤز ـ گؤز ائله ییر نشریه سین ووروب قولتوغونا قاچا مودورون یانینا. عبد ـ ی سالیم بنده لر بونلاردی. یاخشی قویاسان ائله بیر ـ بیریمیزه آتماجا آتیب یازیلمامیش یاسالارا اساس خانیم کیشی ایکی سیرادا صف چکه.

باشیم اوسته آللاه وار بونودا دئییم بعضی لری یامان یارا دیر هاااا. خوشوم گلیر جاوابلارین آلمایینجا اَل چکمزلر. تام ایش بیلیجی ژورنالیست دیلر.قورخودان آد آپارماق دا اولمور، صاباح سؤز چیخاردیب دئیَرسیز آیین شایین پول آلیب اونلاری رئکلام ائده. اوستو باغلی بئله دئییم دا! اؤرنک اولاراق «م ـ ت» و «س ـ ا»

دا اوستون وورمایین کیم دیلر، بیلن بیلیب! سونرا معرفت لری اولسا زنگ آچیب هئچ اولماسا بیر تشکور ائدرلر.

آمان او گوندن بو مخبیر تیره سین، بیریسی رئییس اولا یوخسا هر نمنه ایسته یه اَله سالا، دا او یازیق اولدو، مگر اَل چکرلر. لاپ او دیلسیز آغیزسیزی کی من اؤزوم اولام منی ده شوقا گتیریرلر. بو ایل و کئچن ایل «ساری جئیران لارین»اورَک یاندیریجی اولایین بیلیرسیزدا سوسوزلوقدان اورمونون ائششک آداسیندا دوشوب اؤلموشدولر.

بو جئیران لارین اؤلومون نه عیلاج ائله دیم بو کیشی نین بوینونا قویا بیلمه دیک. میستام ـ میستام دانیب دئدی: اونلار قوجا جئیرانیدیلار عومورلری باشا گلمیشدی.

دئدیم: رحمتلییین اوغلو قوجا جئیران بیری، قوجا جئیران ایکی سی ائله اوزانیب اؤلنلرین هامی سی قوجا جئیران دیر. اولمایا اورمو گؤلو بو گونه دوشندن جئیرانلارین هامیسی خودئی ائله ییب غم کدردن قوجالیب؟ لاپ بئله سیز دئیین اولسا یئنه جئیرانین قوجاسی دا جئیران دیر نییه مَغَییت اولمورسوز؟!

دا بیر سؤز تاپانمادان سؤزو بوروشدوروب قاییدیب دئدی: اولا بیلسین اونلارین چوخو گای ـ گیج جئیران دیر. قایالار اوستوندن آتیلانماییب دوشوب دره لرده اؤلورلر.

دا بو سؤزه ننه اوره یی ایسته ییردیر ظفت آلسین. بیر آن گؤردوم جلَسه ده اولان بوتون ژورنالیست قیزلارین گؤز یاشی آخدی،

      خومار اولدوم، خومار اولدوم

جئیران منه باخ باخ ـ جئیران منه باخ باخ

سؤزون قیساسی آللاهین بو گؤزل دیلسیز آغیزسیز مَمه لی حیوانلارینا قالمایان سؤزو دئدیلر. ساری جئیران لاری گاه قوجالدیب، یاشلی جئیران دئدیلر. یوخسا عاغیلسیز سانیب دَلی جئیران دئدیلر.

بیرجه بونو دئیه بیله رم، ائله او جلسه ده ده رئییسین اوزونه دئدیم: ساری جئیرانلارین آللاهی بیلسین سن بیل. بیر او قالمیشدی ساری جئیرانلاری موتور سیکلت ایله اوغورلاییب اَجنَوی اؤلکه لرده ساتسین لار!

هَله بونلاردان علاوه آتالار دئمیشکن: لَپه نی دئمه دویونو دئ ــ دوننی دئمه بو گونو دئ

گونو بو گون باخین گؤرون پاییزدان نئچه گون اؤتوشوب؟ شاعیر دئمیشکن: یاپیشیب قوللاریزی سیلکه له دیم بیلمه دیز هئچ. یئری گلدیکجه منده اورمو گؤلوم دورنالارین گَلمه دییینی یازدیم اوخودوم بیلمه دیز هئچ! سؤز ـ سؤزه گلنده هامیمیز دئییریک بابا بیزلر بئله ییک ائله ییک، قان ایستی ییک، قوناق سئوَریک. به هانی! بیر کیمسه یوخدور دئیه به قارداش هانی، بیزیم بو قوناقلاریمیز نییه گلمه دیلر.

اولمایا دورنالاردا قوجالیب قاناد چالانمیرلار، یوخسا یئل بیله لرین یولدان اوزاق سالیب آزدیریب، یادا نه بیلیم اووچولارین گولـله سینه توش گلیب لر.

هرحالدا ژورنالیست آدی کیلاسلی اولوب بؤیوک دوشسه ده یوزده دوقسان فایزی خود ـ ی منه تای اَداسین چیخاردیب هئچ اولماسا شکیل لری، آلای ـ قولای یازی ـ پوزولاری درگی لرده آراسیرا چاپ اولوب خالا گؤیلون قالماسین یاریم چیلیق بیمه ده واریمیزدیر.

قالیب قولان اون فاییزی دا یا آجیندان اؤلور یوخسا اؤلمک حالیندا. مندن سوروشساز حاقلاریدیر! بیری ائله سؤزه قولاق آسماییب آری یوواسینا چوپ اوزاتسا همَشه بال آری سینا توش گلمَز، بیر یول دا گؤردون ائششک آری سینا راست گلیب گَبَریب اؤلدو! ایندی باخین گؤرون عاغیل نه حؤکم ائدیر. «محمدعلی ارجمندی ـ نشریه آغری ـ یکشنبه 21 آبان 91 شماره 136»  و «نشریه شهامت شماره 18»