آیین شایین 12

هر آشی  قاريشديرماق اولماز عم اوغلو!(1)

مجتبی ارجمند ـ نشریه آغری ـ یکشنبه 9 مهر 91 شماره 135

بيري يوخ دئيه آخي بوي- بوخونا قوربان اولوم، نييه هر باجادان بويلانيب، هرشئیه قولپ قويورسان؟! دوزاوتوروب، اَيري دانيشماغا نه وار؟!

هردلَییه چؤپ اوزاديب، «هردره دن آشماق اولماز نئجه كي نارينجي باشماق اولماز!»(2) – يازيق آتالاريميز بيلمه ييرديلر كي ايندي قيرميزي دان توت، آلا- بولاياجان پالتار گئیيب، گؤي قورشاغي (رنگین کمان) دوزلديرلر! كيمسه ني قيناماق اولماز! من اؤزوم بو آغ- قره، رنگلردن بئزميشم داها!  نه واختاجان بير بُعدلو ياشاماق اولار؟!

حاياتدا چرچيوه لري سينديريب، بير آز آنارشيست اولماق دا لازيمدي، منجه فرقلي ياشام سيناماق هر كسين ايچينده وار، اويانديرماق لازيم.

مودئرن لشمه پروسه سی تام معناسيندا باشماق دان باشلار، يئتيشر بئیینه! بو آرادا باشماغين دانيلماز رولو واردير، بو آشيلماز دره ني آشماق اوچون بو جومله ني چوخ ائشيديب، سايمامالي سيز: «ياخشي! ... اؤزون اوز- گؤزدن سالما!»

نه ايسه! باشلامادان اونجه خاطيرلامالي يام كي من بو هفته «آيين شايين»-ا قوناغام، بيليرم سوروشورسوز كيمين بوي- بوخونا قوربان گئديردين؟!

من كي سؤزو آتديم، آلان آليب! ايندي ده يانداكي يازي دان اوزونو قيريشديريب، قاش- قاباق ائله يير!

آما مندن ائشيتمه ميش اولون، سيزدن نه گيزلين گؤردوم بيزيم محمدعلي بو سايي يا آيين شاييني حاضيرلاماييب، دئديم فورصت دي بيله سيني تاپدالاييم اؤره ييم باشي سرينله سین  !  

آما پاپاغيميزي دوز قوياق! دونيا بئله قالماز، صاباح دا وار... بالتاني لاپ ديبدن وورماق اولماز، قوهوم دئييب لر، يولداش دئييب لر...

بيزيم عم اوغلونون ياخشيلیق لاریندان، اؤرنك اولاراق يومشاق توركجه يازماسيدير، سؤزو بوروشدوروب يورما لازيم دئييل، آچيق-آيدين سؤزوم اونلارلادي كي آياق ديره ييب لر، توركجه يازاندا يابانجي كليمه لر قوللانماسين لار!

عربجه ياخود فارسجا كليمه لر يئرينه كاشغري سؤزولويونو آچيب نئچه مين ايل بوندان قاباق سؤزجوك لري ايشله ديرلر، بلكه ده بئله فيكيرله شيب لراوخوجولاري ندا 10 مين ايلليك قيدمتلري وار! نه بيليم...! جین آتینا مینیب، «كليمه بورج آلماق هرديلين گوزلليیي دير»- سؤزوده بئيين لرينه باتمير، فيضولي و واحیدين شعرلرينده ده چوخراق فارسجا- عربجه سؤزجوك لر بولونماقدادير، آما ائله بونلاري اوستاجاسينا يازيلاريندا گتيريب لر كي اينسان سيخيلمادان شعرلرين آرديني گوزله يير!

ايندي ده الحمدا... يازارلاريميزين سايي گون به گون آرتير، شعرلر كي شعارا دؤنوب، شاعيرلر قاري ننه كيمين اؤيود وئرمه دن واز كئچميرلر يا آسيب- كسيب- بيچيرلر يادا «بتمن» پالتاريندا قورتاريجي اولورلار ياداكي «دده قورقود» شكلينده يول گوستَريرلر...

سانكي بوتون يازارلاريميزدا يازيلاريندا بوسورويا (سئوال) يانيت (جاواب) وئرمكده ديرلر: «سؤزلويون آغزيني آچيب، تميز توركجه اولاراق، (و، يا، كي و...) قوللانمادان ياي تعطيلاتينیزي يازين (نومره 25/ 20)»!

سورونون چؤزومو(راه حل مسئله) راحات دیر:

«تورکجه فیکیرلش، نه گلدیسه یاز»، یازدیغین بیر شئیه بنزه مه سه ده، «رپ ماهنی سی» آدینا اوخویا بیلَرسن!

درد بير- ايكي دئييل كي؛ بيري عوثمان توركجه سي يازير، بيري سووئت دئورينده قاليب، بيري ده منیم کیمین آتيل- دوش ائله یير بلكه يازيسي گؤزه گلسين!

ناظيم دئميشكن؛

درد چوخ، همدرد يوخ

اوركلرين قولاق لاري كاردي– كار

هاوادا قورشونون آغيرليغي وار ...

بوساواش سونا دك ايره لي سورولمه مه لي دير، چاره قيلمالي ييق، بيليرم بو يازيني گورجك منه آتيشاجاقلار، آما من بورادا قوناغام، اوبيري سايي لاردان عم اوغلوم قوللوغونوزدا!

قورشون ياغماميش قاچيم!

بو گونلوك بو قدرعم اوغلو...

ایضاحلار:

-1 بو جومله ني قايناق وئره رك آتالار سؤزو يئرينه ايشله ده بيلرسيز!!!

-2 بيرخالق ماهني سي.

مجتبی ارجمند ـ نشریه آغری ـ یکشنبه 9 مهر 91 شماره 135