... آیین شایین ... ayinshayin ...

آیین شایین - 22

پوسته یه تای گولمک لازیم!

محمدعلی ارجمندی - نشریه نوید آذربایجان - شماره ۵۱۸ - دوشنبه ۴ شهریور ۱۳۹۲

سیاست دونیاسیندا بئله بیر مثل وار "یالانین نه قدر بؤیوک اولسا بیر او قدر اوغور قازانا بیلرسن" سانکی بیزیم گولشنیمیزده مسئوللاریمیز یالانی سئومه دن بیر او قدر چالیشیرلار دوغرو سؤزلری یئکه ـ لدیب دیله گتیره لر.

بو دوغرو سؤزلردن بیری اورمو گؤلونو قورتارالیم آدلی الوان الوان قشنگ سؤزلردیر. بو سؤزلر او قدر حقیقته یاخین هابئله گؤزل ـ گؤیچک دیر گل گؤره سن.

گئجه لری گاهدان یوخودا گؤرورم، اورمو گؤلو دولوب ـ داشیر! بونلا دا برابر شهری باسیب و بیزیمده ائویمیزی سو آلاراق، یورقان ـ دوشه ییم سو اوزره منی آدالارا ساری آپاریر. دئیه سن حضرت ـ ی سولئیمانین خالچاسی اوسته اوزانمیشام، بو سفر آما گؤی اوزونده یوخ سو اوزونده "قویون داغینی" کئچیب "ائششک آداسینا" ساری یاخینلاشیرام!

ساری جئیرانلار نئجه آیاق یالین قایالار اوسته جلمان گئدیر! اؤزونده هامیسی جاوان جئیران دیر!

نه لر گؤرور بو گؤزلریم آللاه، به بو "عباس نژاد" محیط زیست ـ ین ایرئی سی خبرنگارلارا دئییردی، اورمونون جئیرانلاری قوجالیب چوخودا گای ـ گیج دیر، اونا گؤره قایالار اوستوندن یئره ییخیلیب اؤلورلر.

آما بونلارین کی هامیسینین کئفی ساز دیر! هن؟!

ـ دور آیاغا، یاندیم سنین الیندن، آللاه هامی یا اوشاق وئریب منده! به سنین ایشین ـ گوجون یوخ؟ گون اورتایا کیمی یات، گئجه نی ده بایقوشا تای کامپیوتر دالیندا آسیلی قال!

آنامین مهربان سسینه! دیک قالخیب یئریمده اَیله شیرم.

ـ قادانی آلیم آنا، مین دفعه دئمیشم گلیب خافا ـ خافدان آدامی یوخودان آییتما!

دئمک بونلارین هامیسی رویادیر! یئنه شوکورلر اولسون شهریمیزی ـ ائویمیزی سو آلماییب. یوخسا هامیمیز سودا بوغولاجایدیق.

دئییرم بو کیشی نین اوغلو «موغان و بیله سوار وکیلی حبیب برومند» بیر شئی لر بیلیرمیش دئییب، آرازدان اورمویا گرک سو کمری چکیلمه یه، یقین سونوجون بیلیرمیش نه اولاجاق. آللاه ایشین راست گتیرسین دئمه لی من گؤرن یوخونو قاباقجادان یوروملاییب. آنجاق بیر یئرده قالمیشام ندن خزردن سیمنان چؤلونه چکیلن سو کمرین یوروملایا بیلمه ییب. نه بیلیم واللاه بلکه ده او قره باسان یوخولاردان ایمیش بئیناوا قورخوب یوروملایا!

هر حالدا دیلینه قوربان، بیزیم کی قازانجیمیزا اولوب، اورمونو سو آلمادی!

هله بو هاراسی دیر. بو تایدان تا اورمو ـ تبریز وکیللری اورمو گؤلونون قدیم ماوی رنگلی خریطه سی یانیندا یادیگاری شکیل چکیب، بیر ـ بیرینه حربه ـ زوربا گلیرلر.

بیری دئییر، بولوتلاری من بوغاز ائتمیشم! او بیری دئییر سو کمرین من سالمیشام. داها بیریسی گؤلو باهانا ائدیب اکین یئرلرین گئنیشلندیریب سووارماق ایسته ییر. و بیر آیریسی مجلیس سئچگی لرین گلن دئورینی دوشونور. هابئله ها ....

کند اهلی یاخچی بیلر. بیر نئچه یوز باش داوار سوروسون، ایکی ـ اوچ گئچی، اوتای ـ بو تایا سوروب آپارا بیلر. آما گئچیسی اولمایان قره سورونو نئیله سن انگینی یئره سورتوب دؤنوب قاچاجاق!

ایندی بیزیم و بعضی ضییالی لاریمیزین یوخسا اؤزلرینی ضییالی بیلن وکیل لریمیزین حال و حیکایه سی بئله دیر. یئری گلدیکده یول گؤستریجی یوخ بلکه یول هامارلییان اولوبلار.

سؤز قونوسو اولان بو دوغرو سؤزلردن بیر نئچه سینی کئچن پئرزیدنتیمیز و بیرینجی معاوینی اورمو سفرینده دیله گتیریب تاپشیریق وئردیلر.

سانکی سونوجو نییه اولمادی اونو کؤچوب گئدن دورنالار یانیت وئره جک.

نه آرازدان سوگلیب چاتدی نه زاب دان نه سدلر دالیندا بالیق بئجَریب برق ساتانلار سو وئردی نَده بولوتلار!

دئدیلر اورمونون بوغازینا داش ـ قومدان سالینان کمرین باشا ـ باشینی دمیر لوله لری ایله دلیب سو اؤلمه سین دئیه اونون دولانماسی لازیم. سانکی بو سفر لوله تاپیلمادی!

بیلمیرم اورمونو ماوی رنگلی چیزگی مدادلار ایله سویا دولدورماق اولار یوخسا ...

آما نهایت اَن گؤزل دوغرو سؤزون یئکه سینی لوت کویرلر آتاسی پرویز کردوانی دیله گتیریب دئدی: اورمونو قورودوب باشا ـ باشینا پوسته آغاجی اَکمک لازیم و پوسته یه تای گولمک لازیم!!!