آیین شایین ـ 7

بیمارستان ـ نازلی پرستار ـ زولفونو باس یاراما ـ شاعیر گول اندام و ...

محمدعلی ارجمندی ـ نشریه آغری ـ یکشنبه 11 تیر 91 شماره 130

دئییرم خدایا خداوندا هئچ یاراتدیغین بنده نی یئرلرده قویما، بیزیم بو «طراح عمواوغلو» کئف سیز لییَندن بری، مین یول آللاه درگاهینا شوکر ائله ییرم، ساغلام بدنیم وار! بیر یول بو خارابا قالمیش بیمارستانلارا یولوز دوشسه بیلَرسیز نمنه دئییرم. کیشی هئچ سایماییرلار بیری اورژانسی دیر، بیله سین قان آپاریر، تعجیلی یاردیم ایسته ییر. پول وئرمه یینجه نوخوش اوزانیب اؤلسه ده دئیه جک لر اول!

آدام بئله سیر قالیر! نه لر دئییردیلر، نه لر گؤروروک.

کئچن هفته بو گون کی گون یازیق عمواوغلوم، بوز بالتاسینا تای ساغ ـ ساغلام گئدیب وئریب تجروبی دیش چکن، آنبیر قیفل ایله عاغیل دیشینی چکه، بیلمیرم باشینا نه اویون گلیب او گوندن بئله یه بیر ایچیم سویا حسرت قالیب، یاخچی ائله قان اودور.

جومعا آخشامی آنجاق اؤلوسون ییخمیشام بیمارستانا! دئمه دیشی آغیر وضعیتده عفونت ائله ییب قانی دورماییر. البته هر نه باشینا گلسه حاقیدیر، ها دئدیم آپار وئر دوزه باشلی دوکتور چکسین، عاغیل دیشی دیر اَلییَن ایش وئره جک. من دئدیم من ائشیتدیم، ائله اوشاقلیقدان کوناز دیر، هامی یا عناد ائله ییر. ایندی ده نئیله ییم بیر کؤرپه اوشاقا تای اوتوروب آغلاییر. بیله سینه نیسگیلیم گلیر.

سیزه دئییم اورژانس دان!

بیری چای ایچیر، بیری میرتا ووروب، بیری تلوفونلا دانیشیر نه دئمیشم ها! بیر ایکی یول پرستارلاری دوکتور آدی ایلا سسله دیم! بلکه بیزه ساری دا بیر باخسینلار، آما یوخ دئیه سن هئچ آدام گؤرمه ییرلر. داها مجبور اولاراق یالوار ـ یاخارا دوشوب آغلایا آغلایا اوجا سس ایله دیللَندیم:

نازینا قوربان اولوم نازلی پرستار

گلگینَن «طراح عمواوغلوم» گئدیر اَلدن

باشینا بیر ایش گله نه داش سالیم من

نشریه چیخمایاجاق واختیندا هر آن!

آندان ـ گئج دن اویرنجی «دانشجو» قیزلارین بیری گلیب، هیرسله نه ـ هیرسله نه دئییر: من پرستار دئییلم! دئدیم باغیشلا خانیم دوکتور، دیل دوداق اشتباهی اولوب، چوخ گذشت ائله یین.

خانیم دوهتور: یاخچی نه یی دیر.

واللاه خانیم دوکتور عاغیل دیشینی چکدیرندن آغزی بورنو کفله نیب، دیلی ده توتماییر دانیشا ائله دونن گئجه دن پامبیق دیر تَپیرم آغزینا! بلکه قانی کسیله، اونودا ایندی یه ده ک هئچ تفاوت ائله مه ییب.

دوکتور: آچ آغزی یین گؤروم.

عمواوغلو: آااااااااااااااا

دوکتور: واه ـ واه چوخ پیس عفونت ائله ییب، بو گئجه نی بیزه قوناق اولمالیدیر. یازیرام یاتیرداق! عمواوغلو دوکتوره ساری باخیب دیلی توتار ـ توتماز سسله ییر: زولفو ـ زولفو ...

دوکتور: بو نه دئییر باش تاپمیرام، زولفو کیم دیر؟! دئدیم خانیم دوکتور ادبسیزلیک اولماسین! سیزه گؤره بیر شعر ایسته ییر اوخویا دیلی توتماییر.

دوکتور عمواوغلونون دفترچه سین آلیب داوا درمانی یازارکن گؤزو هنرمندان بیمه سینه ساتاشیب دانیشیق لحنی یوموشاناراق، چوخ ادبلی اینجه سسلی قاییدیب دئدی: بختور باشیما، خب! نه دئییر؟

دئدیم اؤزر ایسته ییرم خانیم دوکتور منظورو، «زولفونو باس یاراما ـ قویما منی قان آپارا» دیر.

خانیم دوکتور گولومسه یه رک، دفترچه نی آستاجا عمواوغلونون اوزونه ووروب بورا باخ اوغلان! سن دئین یارا، هؤروک لو ساچ ایلا دا درمان اولماز، ایینه لری واختی واختیندا ووردوراسان، دئییب گئتدی.

هرحالدا نشریه بیر نئچه گون گئج چیخسادا نَده نین باشا دوشدوز! بو سفرده سالاق یازیق مجتبی نین بوینونا گؤرَک گلن سایی نه باهانا تاپاجاییق!

آما کئچن هفته ده اؤز وئرن ایکینجی اولای دان سیز عزیزلره دئییم. یقین آدلی ـ سانلی شاعیریمیز کریم گول اندام ـ ی تانییرسیز. شعرلری چوخلارینین گؤزونه دورتولور. اؤزللیکله رحمتلیک شهریار دئمیشکن: «مس سن آ بالام ـ هر ساری کؤینک قیزیل اولماز» اولان هادارام ـ پادارام دانیشان سخنور ادیب لرین گؤزونه!

کئچن هفته ائله یاخچی یئریز بوش اولسون! اورمونون صفی الدین اورمَوی آدلی زالیندا قورولان شاعیرلر! مجلیسی دئیه سن بؤیوک بیر یانلیشلیق اولاراق! شاعیر گول اندامین، دوغوم گونونه دوشموشدور. بونا گؤره ده شاعیر شعرلرین سئونلردن بیر نئچه سی، گول چلنگی باغلاییب گول اندامی آغیرلاما اوچون اورمَوی زالینا گلمیشدیلر. آما گؤزوز یامان گون گؤرمه سین همن بو ایشاره ائتدیییم «مس» لَر! بیر داوا ـ هانگاما سالدیلار گل گؤره سن، یانی «مس» یئرینه «آیاق داشی» دا اولسایدی، اَریییب یئره گییرَردی، سانکی آما ...

کیشی! شاعیرلر مجلیسینده بیر شاعیرین گول چلنگین ظفت آلمایاسان باخ گؤر نه اولار.

بیری ده بیرینجی سیرادان قالخیب هئچ دوشونمه دن دئیه: نه آغیرلاماسی، اوندا گرک هر هفته ائله ایشیمیزی بوشلایاق آغیرلاما توتاق!

دئین یوخدور، آخی سنین او سپید ـ سیاه شعرلرییَن قوربان کسیم، یئتمیشه یاخین یاشین وار، یئددی بند آدام اوزلو شعرین یوخدور، سنین نمنه ین آغیرلاما توتاجاق لار. پاخیل لیقدان یئرینده اَیله شه بیلمه ییرسن.

آ کیشی واللاه بیر درد دئییل کی، آدام بیلمه ییر بو قوش بئیین اینسانلارین اَلیندن هارا باش گؤتوروب گئتسین.

هله لیک.