آیین شایین ـ 14

علم و ادب توکان بازاری!

محمدعلی ارجمندی ـ نشریه آغری ـ یکشنبه 12 آذر 91 ـ شماره 137 

قلم چی، مدرسان شریف، آزمون گاج، آینده سازان، اندیشمندان، ... و بونون آردیجا اساتید مجرب در خدمت شما، قبولی دانشگاه را از ما بخواهید، دانش آموزان و دانش باختگان عزیز بشتابید و رتبه های تک رقمی کنکور را با ما تجربه کنید!!!

سلام علیکیم، خوش گؤردوک بوتون آیین شایین ستونون وفالی یولداشلاری.

آ ـ کیشی سلام موستَحب دیر، علیکیم سلام واجب. «آغری» دان آجیقلی سیز! نه دن آیین شایین دان اوز دؤندریب کوسوبسوز!

مشد عیباد دئمیشکن: او اولماسین ـ بو اولسون.

بیر نئچه بؤلوم دن سونرا بیر دنه رئکلام آلمیشیق، باخین گؤرون بورنوموزدان گتیره بیلَرسیز یوخسا یوخ. شوکور اولسون تانری درگاهینا «رادیو ـ تلویزیون» چوخ اوزر ایسته ییرم «صدا و سیما» بیزه ده بیر ماجال وئردی الوان الوان کنکور کیلاسلاریندان دینیب ـ دانیشاق.

تلویزیونو آچیسان ماجال وئرمه ییر کیپریک ووراسان، دال با دال، علم و ادب توکان بازاری دیر کی جَلمان «یاللی» گئدیر. بیری رتبه تک رقمی گتیریب، او بیری جوت رقمی.

بیری دئییر: گلیرسن یوخوما هر گون هر گئجه، او بیری دئییر: قادانی من آللام «پارا» یولوندا.

ایل باشی آرا سیرا بیر نئچه اؤیرنجی یه ده بیر ایکی «یاریم سکه» وئریب تاپشیریرلار کامئرالار قارشیندا گولومسه ییب «هه یه» دئسین لر. پیس دئییرم دئنن پیس دئییسن، بشتابید ـ بشتابید! با شرکت در کلاسهای ما رتبه های تک رقمی کنکور در انتظار شماست. قدیمدن دئییبلر: گؤروشن کنده بلدچی لازیم دئییل.

من دئمیرم سیز دئیین، دونیانین باشا باشیندا هانچی بیر تئله کانالدا پول آلیب علمی ـ ادبی حراجا قویارلار، یوخسا هانچی بیر کانالدا اونیورسیته لره یول تاپماق اوچون «آموزشگاه» لاری رئکلام ائدرلر.

قورخ او گوندن کی علمی باهانا ائدیب باققال توکانی آچاسان، یوخسا sms گؤندریب اؤیرنجی توپلایاسان، یقین بو sms لردن سیزلره ده گلیب، واختسیز خوروزا تای گؤروسن گون اورتا چاغی، گئجه یاریسی موبایل اؤزون اؤلدورور. بو رئکلام sms لر یادا کیلاسلی دانیشسام! «پیام چه های بازرگانی در رخسار پیامک» لره گؤره ده، فراوان قدر! سؤزوم وار. آما بو سفر هله یئری دئییل.

میللتین سوچو نه! گئجه یاریسی فوشقا سسینه دوروب یئرینده دیک ایله شه. بئله اولور دئییرلر: اس ام اس یوللایان آتایان لعنت.

دئییردیم قورخ او گوندن کی sms گؤندریب کوتلوی اؤیرنجی توپلایاسان. بونلارین ثمره سین ایندی بو گون گؤزوموزله گؤروروک.

بو دادلی ـ دوزلو گؤرونتولردن بیر ایکی سین ضییالی دوستوم قوچعلی ایسکندر زاده نین کافی نتیندن تاماشا ائده بیلرسیز!

اؤیرنجی: سلام، آغا راز و رمز شعر رودکی یه گؤره بیر مختصر تحقیق ایسته ییرم، گؤزل اولسون هاااا

کافی نت: خانیم نئچه صحیفه اولسون؟

اؤیرنجی: سه چهار ورق اولسون دااا! ائله کی اوستادیم نمره می کامل وئرسین

کافی نت: یاخچی حاظیرلایارام، آخشام چاغی گلیب آپارا بیلرسیز

اؤیرنجی: نه! سیزی آللاه، عصر چوخ بئواخت اولار، بعد نیم ساعت کیلاسیم وار، ایندی تاپساز ممنون اولارام، قیمتی ده مهم دئییل. نئچه بویورساز تقدیم ائله ییم!

ایکینجی پرده:

کافی نتین قاپی سی آچیلیر. یوغون بیر محصیل اوغلان، اَلینده کی ساندویجی دیشله یَرکن دَرین نفس آلیب دئییر: بیر دَنه نوشته! ایسته ییرم، علم و ثروته گؤره

کافی نت: اوغلان، آغزیندا کی چؤره یی یئ سونرا آدام اوزلو اولاراق دانیش گؤروم نمنه ایسته ییرسن. نییه اؤزون یازماییرسان!؟

محصیل: معللیمیمیز اؤزو دئییب، اینترنت دن تاپیب یازین! واللاه!

کافی نت: نئچه صحیفه اولسون؟

محصیل: بئش یوز تومنلیک دن چوخ اولماسین!!!

هارداسان صابیر قبیرین نورلا دولسون، بو آداملار همن دیر، فقط گئییم لری دئییشیب بیر آز کیلاسلی دانیشیرلار یوخسا میثقال جا اویان ـ بویان اولماییب. صابیر سن بختیارسان! شعرلرین گونو بو گونده یاشاییر.اولماسین فهمین، عقلین، ایدراکین ـ وار نه غم تا کی وار دیر املاکین. محمدعلی ارجمندی ـ نشریه آغری ـ یکشنبه 12 آذر 91 ـ شماره 137