ذره منم، گونش منم، چار ایله پنج و شش منم!
آدی دولت دیر، اؤزونه گؤره بیر دولت ساییلیر. سانکی یئریینده آیاقلاری آلتیندا یئر تیتره ییر. بو آغیرلیقدان یوخ بلکه دیم دیک یول گئتمکدن گلیر. خنجر سایاق قاشلاری اونو داهادا آرتیق جذبه لی گؤسترمکده تاثیرسیز دئییل. اون بارماغینین هر بیریندن مین بیر هنر دامیر دئیه یار یولداشینا یاندی قیندی وئرمکده شاگیرد اول دیر. منم منم دئیه شاعیر نسیمی نین شعری دیل ازبری دیر: ذره منم، گونش منم، چار ایله پنج و شش منم!
نه اندازه سخنور بیریسی اولوب، خافا خافدان، اوردا بورا چیخیش ائدیب یان دؤوره سینی دیسکیندیرسه ده داها چوخ اللرینی ایشه سالیب ظولم ائوینی ییخدیقدا اصیل اوستاکاردیر. خوی زلزله سینده دولت تیکن ائولر برباد اولسادا، نه یاخجی کی آدی بللی وارلی کارلی مغرور دولت لر بیر یئره توپلانیب گونه باخان آدلی اومود ائولرینی برپا ائتدیلر.
آدی بللی دولت اوزده آشکار ائتمسه ده گیزلی ده پیر سولطان آبدالین مریدلریندن اولاراق هر یئرده، آتام علی دن ایمداد آلاراق دئییر:
آچیلین قاپیلار شاها گئده لیم ـ سیاست گونلری گلیب چاتمادان ـ آچیلین قاپیلار شاها گئده لیم.
دولت بو حق سؤزلری ایله یاناشی رقص سماء دا افراط ائدیب باشی فیرلاناراق گئت به گئت چکیلین چکیلین یولومدان دونیا باشیما فیرلانیر دئیه قاپی یا بیر توققا ووروب اوزو قویرو حالین اورتاسینا سرَلنیر. آناسی بختور باشیما خارخین اوشاغی گئدیب دوکتور مهندیس قاییدیب گلر. بیزیم دولتده گئدیب فیریلانماقی اؤیرنیب قاییدار!
بایراما یاخین شهرده یومورتا بویاییب دویوشدورسه لرده بیلین کی هامینی دولت قورشالاییب باشا سالیب یا خود هامی الینه بیر ساخسی فینجان آلیب اویناتسادا بیلین کی دولت او ایشین ایچینده وار. گویا استادیوم یوللارینی فتح ائتدیکدن سونرا داها آرتیق گوونج قازانیب دئییر: دولت منیم نه وئیجیمه دیرکی سونرا قش قش گولوب من اؤزوم دولتم! بوردا منم، باغداد دا کور خلیفه.
آیین شایین ـ 031130
محمدعلی ارجمندی (آيين شايين)