جیلولوق سوی قیریمین 107 جی ایل دؤنومو

آذربایجان موعاصیر تاریخینده (بایرام آیی – اسفند) آذربایجانلی لارین سؤی قیریم گونلری ایله بیرگه یاد اولور. اورمودا جیلولوق سؤی قیریمی 1296 جی شمسی ایل بایرام آییندان اوچ گئدن بو شهرده باشلاییر و جیلولار همان آیدا چارشنبه سوری قتل عامین تؤره دیرلر و آلتی آی بویونجا بو دهشتلی گونلر باتی آذربایجان تورپاقلاریندا اورمودا، سالماسادا، سولدوزدا، خوی دا داوام ائدیر. ایران خاریجه ایشلر ناظیرلیینین گزاریشلرینه اساس ۳۰۰ مین نفوسدان عیبارت اورمو بولگه سینده ساواش دان سونرا ۵۰ مین نفوس دیری قالیر.

بو دهشتلی اولایلار ایرانین وزارت خاریجه سندلرینده یا خود میللی مجلس سندلرینده گون به گون ساعات با ساعات قید اولسادا چوخ تاسوفله رسمی تاریخ تقویمینده یا خود درسی کیتابلاریندا بیر سطر قید اولمادان هله ده وار اؤرت باسدیر اولونوب گیزلی ساخلانیر!

اوزون ایللر بویو وزارت خارجه ده اورمیه کارگزاری معتمدالوازره نین گزاریشلری ایت باتیر اولسادا نه یاخجی کی دوشونجه لی قیزی ربیعه خانیمین چاباسی اوزره بو گزارش لر کتاب اولاراق ایشیق اوزو گؤردو و هابئله احمد کسروی نین چوخ دیرلی یازیلاریدا بو قونودا تدقیقاتچی لارا یول گؤستریجی اولدو. یوخسا کسروی دئمیشکن، غرب اؤلکه لرینین مخبرلری اؤزللیکده منچستر گاردینین پول شیمون آدلی مقصدلی خبرنگاری بو اولایلاری تام ترسه گؤسترمه یی باشارا بیلردی.

ایران دولتی بو حاقدا سوسوب یئرینه 21 آوریل آدلی ساختا ناغیلل لاری ایله یول بیر اولسادا، آذربایجانین اؤزللیکده اورمونون مستقل تدقیقاتچی گنجلری بو قونویو گؤنده مه گتیریب موختلیف سیته لرده، درگیلرده، قازئت لرده، اؤیرنجی نشریاتیندا و اورمو آذربایجان تلویزیون کانالیندا آردیجیل اولاراق جیلولوق سؤی قیریمینا توخونوب گوندمده ساخلایا بیلیبلر.

جیلولوق سوی قیریمی ایراندا رسمیته تانینسین گرک و بو بیزیم آماجیز. بو یولدا دورمادان چابا گوستریب یئنه ده یازیب یارادیب اوجا سسله مظلوم شهیدلریمیزین حاققینی فریاد ائده جه ییک. جیللولوقا عایید کوتلوی مزارلاریمیز قاراصاندیق مزارلیغینا تای سوکولوب داغیلمادان جانلی سوی قیریم موزئی اولاراق برپا اولمالیدیر.

قانلی اسفند آیی هابئله خوجالی سوی قیریمینین نیشانی دیر. و نه یاخجی کی آذربایجانلی لار بیرداها بو عزیز دوغما تورپاقلاریمیزدا اذان دئییب مسجیدلریمیزده ناماز اوچون صف باغلاییبلار.

وطن بورجوم اولاراق ایللر بویو بو حاقدا نشریات دا هابئله بیرینجی دفعه اولاراق تلویزیوندا جیلولوق حاقدا یازیب دینیب دانیشسامدا بایرامی آیی موناسبتیله جیللوق سوی قیریمینی گوندمده ساخلایاق دئیه استوری اولاراق بو اولایلارا توخوناجایام.

محمدعلی ارجمندی - ۰۳۱۲۰۴