آیین شایین

آدی «باغیر» دیر. میوه مئیدانینین بوینو یوغونلاریندان ایدیر. اوزونه گؤره یان دووره سی وارایدی، سانکی تهرانلی بیر دیلروبایا وورولوب ائولندیکدن بری حال و احوالی محول اولوب خانیمی سی نین گؤستریش ایله آدینی دا دییشیب «بردیا» قویوب. آدی اوستونده قنیم اولسون چوخ جهد ائدیر هامی بیله سینی «بردیا» سسله سین آما نه یازیق کی قدیم یار یولداشی هله ده وار «باغیر» دئییب چاغیریر.

ائله منده بنده ی عادت اولاراق بو قیسا یازی دا باغیر آدی ایله خطاب ائده جه یم. باغیر بیر زامانلار سسی گوروللسده ایندی چوخ باکیلاس اولاراق اینجه سسله، آره ـ باشه دئییر.

سؤز قونوسو اولاراق بو آیین شایین یازیدا باغیرین شیراز سفرینه توخونماق ایسته ییرم. باغیر هر ایل تورکییه سفرینه گئتسده بو ایل «تورکیه نی تحریم ائدک آجیندان اولسون» آدی بللی کمپینه قوشولوب دئیه، عاییله ایله بیرلیکده شیرازا سفر ائدیب ایل تحویلی حافظیه ده کئچیردیب. حافظیه نین باسا ـ باسلیق، قالابالیق ویدئولاری سانال دونیادا یاییملاندیقدا باغیری گؤروب منده گؤندریبلر.

آللاهی آند وئرمیشم اؤز بویکلویونه آدامی برق توتسون آما جو توتماسین. باخیب گؤره سیز باغیر نئجه صفین اوولینده ایکی قوللارینی اوزاردیب بوینوندا غیرت داماری جوشا گلرکن قیشقیریر: ما آریایی هستیم، عرب نمی پرستیم! دئدیکجده گؤزلرینی برلدیب اوتای بوتایا باخیب قودوراراق یئنه اوجادان دئییر: ما آریایی هستیم، عرب نمی پرستیم!

داش اولوم دوشوم باشینا سنین، بیری یوخدور دئیه اولان سن عومرونده بیر بیت شعر ازبردن بیلیرسن هله دوروب گئدیبسن او بویدا بؤیوک حافظ قرآن ـ ین مزاری اوسته بامبیلی ـ بامبیلی سؤزلر دانیشیرسان!؟

ائله باخین گؤرون ایرانین هر یئریندن باغیر کیمی آداملاری اؤتورسن حافظین مزاری اوسته او گؤزللیکده گوللو چیچکلی باغی ناخیرا تای آیاقلاییب کئچرلر یا یوخ. بیلمیرم ایندی اوردا بیر بیرینه توققوشوبلار آیری بیر ایشلر اولوب یا نمنه ایکی اوچ گون سونرا باغیر بیر پست پایلاشیب یازیب: متاسفم برای این حکومت ضد ایرانی و آن دسته از انسانهای پلیدی که جهت مقاصد دیگر در حافظیه حضور داشتند.

یئتیملرین بیریده گئدیب کامنت یازیب قویوب: کئچمیش اولسون باغیر بی!

ماللانصرالدینین مشهور بیر سؤزو وار دئییر: ائولندن سونرا بللی اولاجاق هارالییام. ایندی چوخلارینین حال و حیکایه سی ده باغیرین حیکایه سینه تای دیر بس نه یاخجی کی بابلی بابیندان دوشسون تا اؤز یئریشیغینیده ایتیرمه سین. بونا باخمایاراق کی ایران آدلی جغرافیادا، آد دا هامی مسلمان دیر آما نه یازیق کی بو سون ایللر زرتشت بازلیق نه بیلیم کوروش بازلیق یامان مد اولوب و مدباز جاماعات بیله بیلمه یه بو یانلیش یولون یولچوسو اولوبلار. آخماقلیقا بیر باخین ایسلامی هویتلرینه قارشی اوردا بوردا توپلانیب دئییرلر: ما آریایی هستیم عرب نمی پرستیم یا خود اؤزلرینه گونده بیر پدر آختاریب صاباح بیریسی گونده خویدوده حاققیمیز رسمیته تانینسین گرک، دئییب میتینگ قوراجاقلار.

طبیعی کی غرب مئدیاسی دا اوستاکارلیقلا بونلاری یاییملاییب ترویج ائدیر و بونا قارشی آذربایجان بو اویونا باش اییب گلمه یینده اعتراضی حرکاتی تحجر آدی ایله ایچری ده و ائشیکده بایکوت اولوب محکوم دا سالینیر!

محمدعلی ارجمندی ـ 04/01/04