آی خومار باخیشلی باغبان قیزی ـ چادراسی سورمه یی گولو قیرمیزی!

قدیم کندلرده یا خود شهر محله لرینده چرچی لری گؤرموشدوز گتیریب قاب قاشیق یا چیت پارچا بزاز مالی ساتاردیلار، بو چرچی لری بیر او قدر خانیم دوره لییب آلیش وئریش ائدردیلر کی ذاتا خانیملارین خلق و خویون گؤتوروب بیر تهر محرم اولاردیلار. سؤز قونوسو شرکتده «بالا جَوَر» آدلی قوجا بیر شوفر وار، بیلیرسیز دا اورمیه لی لر جعفر آدینا جَوَر دییرلر. قان ایستی و گولش قاباق بیریسی و دائما فرقه شاعیری رحمتلیک حاج علی نیشانی نین بو قوشماسینی دیل دوداق آراسیندا اوخویوب سوزدورر:

آی خومار باخیشلی باغبان قیزی ـ چادراسی سورمه یی گولو قیرمیزی ـ گؤزون خومارلادیر گؤیده اولدوزو ....

گولومسه ییب، جَوَر عمی باغبان قیزی نه یی سنه خاطیرلادیر باشقا بیر ماهنی یا کؤنول وئریب اوخوموسان!

ـ ائله دیلیم ازبری اولوب اونا گؤره، قدیم چرچیلیق ائدیب کند به کند گئدیب بساط قوراندا سسیمی باشیما آتیب اوخویاردیم. چرچی نین سسی اولماسا اوندان چرچی چیخماز! آی جانیم کاش ائله او گونلر اولاردی. گؤرردین کندلره یاخینلاشدیقدا اوشاقلار اوزاقدان گؤروب بیر قیشقیریق سالاردیلار گل گؤره سن. کنده چاتدیقدا بیلندگونو الیمه آلیب اوخویاردیم: چرچی گلیب ماران قوز ایله ـ مارانقوزون بیخجیسی، چرچیسی بئلینده ـ آی قاپیسی، پنجره سی سینان ـ مارانقوزلار گلیب و ...

ـ بس ندن چرچیلیغی بیراخیب بؤیوک ماشینا چیخدین؟

ـ چرچیلیغین ائله بیر گلیری اولمور. آرواد خله یاغی ایله باش باشا وئرمک چتین دیر. گؤروسن قاب قاشیق آلیردیلار، پولونو قیرتی قیرتی جانا گتیریردلر وئرینجه! اونلاریدا قیناماق اولمور، ایندیه باخما کیشی نین جیبی آروادین دیر! قدیم کیشی لر آروادا پول وئرمزدیلر کی! اولسادا یوخومدور دئییردیلر، اولماسادا یوخومدور دئییردیلر. اونا گؤره ده آللاه ائله یوخا چیخارداردیر بیله لرین!

ـ جَوَر عمی سن اوزون نئجه مگر قدیم کیشی لردن دئییلسن!؟ یوخ واللاه منیم چیخاردیغیم خالا قیزینین کی ایدی، اینانمیسان گل تیلفونون توتوم اؤزون سوروش بیله سین. آللاه سنه ده خالا قیزیا دا جان ساغلیغی وئرسین. «جَوَر عمی، خانیمنا خالا قیزی دییر و هامی اونون دیلیجه خالاقیزی تانییب سسلر گویا»

جَوَر عمی دانیشیغیمیزین هامیسی چیخدی عرض گیلئی یه، به بیر خوش خاطره دن، مَزه دن بیر دانیش آخی.

ـ واللاه چَرچی اولدون، گرک کیشی لیغیین ده داناسان! آغام عرض بحضور گونلرین بیر گونو ایستی سو کندینه گئتمیشدیم، پارچالاردان نمونه اولاراق تنفه آسیردیم گؤردوم خانیملاردان بیری ائولرینین قاپیسینی آچیب دئییر: جَوَر آی جَوَر. باخ گؤر کوچه ده کیشی ـ میشی یوخدور گلیم وانت باشینا. دئدیم آرخایین اولون کوچه ده هئچ بیر کیشی یوخدور، چیخین گلین. زوبیده آدلی دیلی باشلی بیر خانیم ایدیر همیشه دئییردی: آغاجدان ماشا، کورد دن پاشا، جَوَردن کیشی چیخماز!

محمدعلی ارجمندی ـ 04/09/20