اورمونون علی پنجه سی اوزره اوجا اوچان قارتاللار هله اؤلمه ییب کی بایقوش گلیب بو یئرلرده یووا سالسین!

ایسرائیلین ایرانا اولان سالدیریسیندا، 12 گون بویونجا سیچان دَلیینین ساتین آلان بوینویوغونلارین یئنی دن دیللری آچیلاراق یئنه اونو بونو، دولتی میللتی محکوم سالاراق چوخ باغیشلایین یئکه جیریرلار. بؤروللولر! او کی سیزده یوخدور قیرت داماری دیر. قیرت یانی هئچ بیر ایدعاسی اولمادان پدافند سیستیملری دالیندا ایلشیب اؤلومه قارشی دیک باخیب شهید دوشن قهرمانلار. یا خود قورخماز بیر ژورنالیست قادین! یوخسا آرخایین واخت تریبونلار دالیندا یان اَیکی ایلشیب ژست توتوب دؤرد دَنه قولاغی توکلونون بیندیغی سؤزلری دانیشانا جسارتلی بیریسی اولدوغو دئمزلر بلکه چؤره یی گون قیمیتینه یئین یالتاقدا یالواران تولکولر دییرلر.

رحمتلیک شهید همت ـ ین یاخجی بیر سؤزو وار دئییر: ساواش مئیدانیندا باخ گؤر دوشمان هانسی خاکریزی داها چوخ ووروب تاپدالیر بیل کی اورا خودی جیبهه سی دیر. بوتون بو ایللر، ژن ژیان ئازادی یوخسا ایرانشهری سلطنت طلبلرین خریطه سینی پوزان قهرمان تبریز البته کی هامیدان آرتیق ایسرائیلین سالدیریسینا معروض قالدی. نییه کی آجیقلی دیلار یارالی دیلار. ایندی بیر یول تؤر تؤکونتو ساتقین ایرانشهری لر گلیب وطنپرورلیق دن دانیشیر. سیزین لاب بؤیوکوز سید جاواد طباطبایی اولا ایسلامی داناراق اؤلندن سونرا وصیتینه اساس جَندیین یاندیردیلار. قیزی دا کی آمریکانین فخری دیپلماتی اولاراق موساد جاسوسو چیخیب.

ایرانا، ایرون دئین شاهزادانیزدا کی قورمساقلیق بؤرکونو لاب اوجا قویوب و هامی بونا واقیف دیر. او کی قالدی نارین نورون سلطنت طلب گده گوده لریزده کی ایسرائیله چپیک چالیب دئییردیلر بلکه تهرانی ایکی هفته یه سالیب یئنی دن شاهلیق قوروب دوران سوره جک لر. هابئله قندیل ده کی گئن تومانلاردا بونلارا قوشولوب یووا قوراجاقلار! اورمونون علی پنجه سی اوزره اوجا اوچان قارتاللار هله اؤلمه ییب کی بایقوش گلیب بو یئرلرده یووا سالسین! بو داغین دوشو، اتکلری منیم دوغما آنایوردوم اولاراق اوجا اوچان قارتاللارین، لاچینلارین داها یاخجی تانیرام و بیلیرم کی 12 گون بویو یاغی دوشمانین بومباردیمانینا راغمن بو مغرور داغ؛ دیم دیک دوراراق باخیشی ایله هر زامان اود قیسدیرا بیلر!

او کی قالدی آییق اولماق دیر. دوستو دوشماندان تانیماق و دوشمانی تَرسه گوسترمه مک دیر.

آیین شایین ـ 040405