اورمو باغی اورمونون میللی ثروتی دیر

محمدعلی ارجمندی ـ 040412

ایکی اوچ ایل اولاردی اوستاد افشاری نین قوللوغونا چاتا بیلمه میشدیم. دون آخشام ایمام خیابانینا چیخدیقدا ماجال تاپیب دئدیم بیر کئچیم اوستاد ایله گؤروشوب حالینی خبر آلیم. اوغلو توکاندا ایدی، سلام. نئجه سیز؟ آقای افشاری یوخدولار؟

ـ بویرون اوزومم. یوخ یوخ منظوروم اوستاد افشاری دیر. ـ آهان بلی آشاغی طبقه ده کارگاه دا مشغول دور. ـ ایجازه وار یئنم آشاغی یا. آدیمی سوروشمادان زنگی چالیب اوستادی خبردار ائتدیکده بلی بویرون دئییر.

پیلله لری یئندیکده سئویملی اوستاد عادتی اولاراق عینکینین اوستوندن باخیب منی تاندیقیدا قوللارینی آچیب هارداسان به قاچاق نبی گلیب آدامی یوخلامازلار بیر!؟ شرمنده لیک دن ساوای نه دئیه بیلرم کی. اوستادی باغریما باسیب اؤپدوکده آغاج عطرینی اینیندن آلیرام. چوخ چوخ خوش گلیبسن ارجمندی نه عجب یول آزیبسان.

تانیشدیریم بیلزی اؤیرنجیم و منیم مدیریم سارا، نمنه مجازی ده اوردا بوردا سایت دا عکسیمی گوروشلریمی گؤرورسوز هامیسی بو سارا خانیمین ایشی دیر.

ـ ساغ اولسونلار.

و آقای ارجمندی منیمله روزنامه ده موصاحیبه آپاریب تلویزیوندا مستند فیلمیمی ایشله ین. سارا باخیبسان؟ ـ یوخ!

اوستاد یئنی ایشلریندن بیر نئچه سینی گؤستریب دینیب دانیشیر. سوروشورام گویا کئچن گونلرده میراث وزیری صالحی اورمویا گلیب اورموباغی آدلی شاه اثرینیزی یاخیندان زیارت ائتمیش. بلی گلمیشدیر جنگ دن بیر گون قاباق اورمودا گؤروشدوک. بیر نئچه توحفه ده پای وئردیک بیلسینه! بو نئجه ایشدیر اوستاد او گرک سیزدن خبردار اولوب پای وئرسین.

ـ واللاه منیم مقصدیم بو گؤروشدن اورمو باغی آدلی میللی اثری دیرینجه قورویوب ساخلاماسی ایدیر. اورمو باغی اورمونون میللی ثروتی دیر. میراث فرهنگی، میراث سئور و هنر سئور ایشلینلرین الینده اولمالیدیر نه کی هر آدامی گتیریب بو اداره ده ایشلده لر. چوخ تاسوفله خبردار اولدوم اورمو باغلی آدلی اثریمی موزه مردم شناسی دن هدایت موزه سینه داشیدیقدا بی احتیاط لیک اوزره بو شاه اثره صدمه ووروبلار و گرک کی اوزوم اونا دوباره دن ال گزدیرم.

بو ایشه دیر وئرمه مزلیکلر؛ سایقیسیزلیقلار اوره ییمی سیخیر. اوستاد افشاری موبایلیندا اورمویا عایید بیر تابلوسونو گؤستریب دئییر. بو اثر اینقلابدان اؤنجه، اورمودا صادرات بانکینین زینتی ساییلیر. واختی ایله اورمو هنرمندلری بو اثری ایشلمیش و مرکزی صادرات بانکین سالونونا آسیلمیش.

سؤز یئرینه چکر نئچه ایل بوندان قاباق گؤردوم بانک صادراتین شرفلی کارمندلریندن بیری چوخ اضطرابلا اوره یی دؤیونرک دالیمجا گلیب منی آختاریر. نو اولوب سوروشدوم دئدی اورمو تابلوسونو بانکدا تخریب ائتمک ایسته ییرلر. دئییرلر چرز ایچره اوزوم آیاقلایان خانیملارین قیچلاری گؤرونور. اتک لرینی نییه گرک یاپیشیب اوسته چکردیلر کی!!! اوستاد همن بو گونو واخت آلمیشام بیر ایش گؤره بیلمسک صاباحی ذی قیمت تابلونو تخریب ائده جک لر.

خطری باشا دوشوب بیر ایکی ابزار گؤتوروب بانک ایچره من اورمو گؤزلرینین اتک لرینی اوزارتماقلا بو اثری نجات وئردیم.

بیر باخ گؤر پاس توتموش کافالاری نئجه هنری ایله باریشدیرماق اولار بیلمیرم. هنره خور باخیرلار، هنره مبتذل باخیرلار، بو دوز دئییل. بیر حالدا کی همان سؤز قونوس اولان تابلو اورمونو گؤستریر. اورموگؤلونو، ساعاتلی مسجیدی، اورمونون یام یاشیل قانالارینی و عادت عنعنه لرینی دبلرینی گؤستریر.

اورمو خالقی نین رسم و رسوماتی چوخ زنگین دیر. خانیملاری جوون ازن دیر. بارماقلاریندان مین بیر هنر دامیر. ایندی نین ایندیسیده اوزوم ازیب دوشاب پیشیریرلر. بادرشبی بیدمیش چکیرلر. رب پیشیریب الوان الوان توروشولار قویورلار. البته کی بو دبلر قورونوب ساخلامالی دیر.

اورمودا اوزوم باغلاری قانالاری بام باشقا معنا داشییر. آلما سونرا دان گلمه دیر. من، اورمو باغیندا چالیشمیشام اوزوم باغلاریندا اولان حایاتی و گؤزللیکلری گؤسترم و خالقیم اوچون یادیگار قالان بیر اثر یارادام.