آیین شایین2 دهکده جهانی ـ جهان وطن لر ـ باکیلاس لار 

محمدعلی ارجمندی ـ نشریه آغری ـ یکشنبه 27 فروردین 91

«دهکده جهانی» منیم ان سئودیگیم سؤزلردن بیری دیر، سیزلری بیلمیرم، آما من اؤزوم بیر کندلی اولاراق بوتون دونیا کندلرین سئویرم، اؤزوده فرق ائله مز قودوق بوغان کندی اولا یوخسا گئن تومانلار کندی! سؤزون قیساسی «جهان وطن» بیر اینسانام، سال دوهزار رو دوازده  ده منیم سنین سؤزلرین چؤله آتمالی ییق، نه بیلیم من افشارلاردانام یوخسا نادیر شاه تیره سینده نم و... قوربان اولوم آللاها ائله افشاری دا یارادیب گئن تومانی دا.

باشینیزی نه آغیردیم، تاکسی دا ایله ش سَز بئلَنچی سؤزلردن فراوان! قدر ائشیدرسیز، بوتون دونیانین چتیننیک لری، مملکتین ایشلری، دولارین، سکه نین ایپ قیرماسی! نا گؤره بو تاکسی لاردا صوحبت گئدیر. ماشاا... هامی دا اؤزونه گؤره بیر پارا کارشیناس دیلار، بونلارین لاپ باکیلاسی دا بو جهان وطن باجی قارداشلاریمیزدیر.

دانیشسالار ایلک اؤنجه دئیه جک لر آغا من کئچن هفته نروژ دَیدیم! باخ گؤر اونلار هاردا بیز هارداییق، نفت اوستونده اوتوروب آجیمیزدان اؤلوروک! سانکی آما اوزونه باخسان ائله بیر سوتدن یانیب، تاکسی شوفری نین ده آللاهی وئریب دا، خییاباندا بیر ماشینا یول وئرمه دن او دقیقه ok وئریب صوحبتین دالین توتاجاق: آللاه بو پاسیبانلارین ائوین ییخسین! صوبح چاغی نه وار نه یوخ بئش ثانیه چیراق قیرمیزدان تئز رد اولموشام! یوز مین جریمه یازیب لار، کاسیب گل باش ساخلا، من ـ ی کول باش نه داش سالیم باشیما!؟

جهان وطن مسافر: آغا مشکل بیر دنه دئییل کی، نروژ ده من بیر دنه چیراق قیرمز گؤرمه دیم! باخ بورا، دا دئمیرها شوفر قارداش قادایین آلیم، بئش ثانیه دؤزسن چیراق یاشیل اولسا خنجرین باشی اَییله جک!

بو آن دا گؤروسن بیر آیری موسافیرده اینگیللی یه اینگیللی یه دئییر: هه واللاهی قارداش اوجوردو، منیم ده داغدا اون باش قاطیریمی، یوک ایله با هم توتوبلار! اؤزومده چوخ زور قاچدیم، آخی دؤرد کالون گازوئیلی نییه قویمورلار آپاریب باشیمیزی ساخلایاق! قارداش واللاهی بو مملکت آباد اولماز!!!

جهان وطن موسافیر: آغا اوجوردو! کشتی ایله قاچاق ائله ییرلر، اونلاری بوراخیب، گلیب سیزلری دستگیر! ائله ییرلر، حق دئییرسیز!

سیزنئجه دوشونوسوز بیلمیرم، منجه بو «جهان وطن لره» تای باکیلاس، روشن آدام، یئر کوره سی اوزَرینده تاپیلماز، جان وئریرلر باکیلاس لیقدان اوترو، یانی اوغرو دوشوب ائو اوشاغین سیلیب سوپوروب آپارسادا دئیه جک لر، آغا حقی واریدیر دا! قاپینی اؤزوم کاریخیب آچیق قویموشام! هاردا قالا هله داغدا نیکوتیو ماواد یوخسا گازول داشییان قاچاقچی یا کی صاباح ایلک اولده بو جهان وطنین دوردانه اوشاغین آپاریب معتاد ائلییه جک.

بئلنچی بیر اینسانلاری گؤرَنده آدام آز قالیر پاتلاسین! «گئجه نی اوتوروب voa  یا bbc یه باخیب، گلیب اونلاری جاماعاتا خیردالیر، منه حقوق ـ ی بشردن دانیشیر، دئدیم اولان هئچ کیمی تانیماساق دا یالتاق دا یالواران تولکولری تانیریق دا! گؤروم منیم قاش گؤزومه عاشیق اولوب، 24 ساعاتلیق ماهواره کانالی یولا سالیب لار! نه بیلیم هله آب و تابین دان دا دئیه: «bbc فارسی صدا و تصویری فراتر از مرزها، در هر کجا هستید، تاجیکستان، افغانستان و ایران با ما همراه باشید» حققینده دئییب لر قوجا تولکو انگلیس!

هر حالدا آللاه آدامی جهنمده! ده بو جهان وطن لردن اوزاق سالسین، نه یاخشی تئز یئنیب گئتدی،

ــ آغای راننده لوطف ائله سز من بغل ده پیاده اولاجاغام، مرسیییی! فقط کرایَم نئچه ائله دی بویورون تقدیم ائله ییم!

ــ تاکسی شوفری: قابیل دئییل، 300 تومن.

ــ مرسیییی، ایجازه وئرین گؤروم پول خرد واریم دیر! ایندی ده پول خرد تاپیلمیرکی، پولی ارزیش دن سالدیلاردا! ائله بیل بیر دنه 500 تومن لیک واریمدی، بویورون.

ــ تاکسی شوفری: گل قارداش بو 200 تومن ده قالانی.

جهان وطن، او تای بو تایا باخیب، بیر خانیمی گؤردوکده، چوخ باکیلاس قایئدیب دئییر: بقیه سی! ایسته مز! پول خرد لازیمیز اولار!

هن نه دئمیشم ها! 200 تومنی ده گؤی نئجه سخاوتله باغیشلادی. بیزیم قوچ اهبرده اوگون گؤرورم، اَل آیاغی تورپاغلی دفتره گلیب چکیل اویانادا دئمک اولمور، دئمه 50 تومن اوسته تاکسی شوفر ایله سؤزله شیب یئرده بیر بیرینی سوپوتدورموشلر.

 ایندیسه من دئمیرم سیز دئیین، بیری بیزیم یازیچی اهبره تای 50 تومن اوسته 25000 تومنلیک کؤینه یین ییرتیب حقین آلیر، بیریسی ده بو باکیلاس «جهان وطنه» تای 200 تومنی، نفسی ایستی یئردن چیخاراق باغیشلاییب، شوفرلری پیس اؤیره دیر.

بو آرادا حق کیم ایله دیر؟! محمدعلی ارجمندی ـ نشریه آغری ـ یکشنبه 27 فروردین 91