آیین شایین3پاراـ اورمو گؤلو ـ سمنان، لوت کویر و ...

محمدعلی ارجندی ـ نشریه آغری ـ یکشنبه 10 اردیبهشت 91

آدامی آدام ائیله ین پارادیر ـ پاراسیز آدامین اوزو قارادیر

قوی نه اصلین نجابتین اولسون ـ نه نجیبانه حالتین اولسون

باش ـ آیاق عیب ایچینده اولساندا ـ تک بو عالمده دولتین اولسون

اولماسین فهمین، عقلین، ایدراکین ـ وار نه غم تا که واردیر املاکین

آدامی آدام ائیله ین پارادیر ـ پاراسیز آدامین اوزو قارادیر

دئییرم آللاه سنه غنی غنی رحمت ائیله سین میرزا صابیر. قبرین نور ایله دولسون کیشی، بیر عومور صابون پیشیریب نئچه باش کیلَفه تین باشین ساخلاساندا بیر او قدر چتین لیک چکیب یانمادین، سانکی بو قانمازلار الیندن عومور بویو یانیب، اَرییب بیتدین. آکیشی واللاه ایندی بیلیرم نه لر چکیب سن!

پاران اولسا ـ ساوادلی سان، باکیلاس سان، گؤزل سن، بؤیوک سن، یئکه سن،... سؤزون قیساسین دئییم پاران اولسا هامی نین دانیشیق لحنی ده سن ایله ادبلی ارکانلی اولاجاق. یوخسا پاران اولماسا ایکی قات اَیییلیب بیرینه سلام وئرسَنده، بورنون توتوب، آللاهین آدیندا بورجو اولاراق دیله گتیرَجک. هرحالدا پارا هر نه یین درمانی دیر، بیری من اؤزوم پارام اولسا ائله بو «آیین شایین» یازی لاری وئررم بیریسی منیم آدیما یازار!!!

اؤزومده گئدَرم مشهدی عیباد دئمیشکن: آداقلی بازلیقا، پیس فیکیر ائلَمه یین ها! الحمدا...رب العالمین، آللاه بو گشت ـ ی ارشادین سایه سین بیزیم باشیمیزدان اسیرگمه سین. یوخسا حاشا سیزدن حاشا سیزدن بعضی قیزـ اوغلانلار خیاواندا هئچ اوتانمادان قول قولا یاپیشیب گئدرلر! دئییرسیز بلکه قدیم زامانلاردیر. آبیر حَیادا ائله قدیم آداملارلا گئتدی!

کیشی لرده کیشی لیک وار ایدیر. کیشی نین باشین کَسردین آرواد ایله چیین به چیین یول گئتمَزایدیر، اؤزو بیر نئچه آددیم ایرَلی گئدردیر آرواد دا دالیسیجا. آرواد لاردا کیشی صفت! غیرتلی اولاردی. گؤرردون بیر اللری ایله اوشاقی قوجاقلارینا آلیب بیر اللرینده قیرمیزی زنبیل، گؤزل گؤیچک لچک لرین ده دیشه توتوب نئجه نزاکتلی یول گئدردیلر! اؤزونده پول قدری بیلن اؤنملی مساله ده بودور.

پارا بیلمیرسیز اولمایان ایشلری گؤرر. واللاه ـ بیلاه پول اؤلونوده دیریلدَر. منی اینانین، سؤزومو غربته سالمایین. بیریسی ائله بو «لوت کویر» اؤلودوردا اؤلونون ائله قاش ـ گؤزو اولماز کی! لوت کویرده آللاهین بیر «بؤیجویون» ده تاپماق اولماز، آما باخین گؤرون بیر نئچه ایلدن سونرا پارا گوجونه «خزر ـ لوت کویر» سو کانالی نی چکندن سونرا اوردا آلما ـ اوزوم بئجه ریرلر یوخسا یوخ. دا بوردا باغلار شورالیق اولاندان سونرا لوت کویرین صادراتی آلما ـ اؤزومون یئیه جه ییک. هله باجاریقلی اولسالار بیر نئچه گؤل ووروب اوزون بورون بالیغی دا بئجره بیلرلر.

بو سو کمرین کیم سالیر؟ سمنان وکیلی «کواکبیان» دئمیشکن: شخصی سرمایه گزارلار! آچیق دئییم منه تای بعضی بی سوادلاردا دوشونسون. یانی سمنانین شخصی سرمایه گزارلاری هر بیری بیر نئچه 100 کیلومتر سو شیلنگی آلیب، خزردن لوت کویره آتیب لار اوردا تَره توره دن اَکیب بئجه رَه لر.

بیزیم کی لرینده داش دوشسون باشلارینا، هَله بیر نئچه متر شیلنگ آلیب اورمو گؤلونه آتمیرلار هئچ! اللرینده ایکی آفتافا سودا دولدوروب آپاریب اورمو گؤلونه بوشالتمیرلار. دانیشدیراندا دا دئییرلر: آ کیشی شور گؤل نه ییمیزه لازیم، حییف دئییل سدلری آچیب شیرین سویو دولدوراق دوزلو گؤله!!! سدین دالیندا یئنه قیرمیزی بایرام بالیقی بئجَه ریریک. ایکی دستگاه موتور آتیب برق ساتیریق. جومعه لری ده گئدیب جت اسکی گئدیریک. شور گؤلده مَیه جت اسکی گئتمک اولار!!!

بونا گؤره رحمتلیک صابیر دئییب: آدامی آدام ائیله ین پارادیر ـ پاراسیز آدامین اوزو قارادیر

قورخمایین سیزی دئمیرم آجیغیزا گله. خود من کندلی! هاردا جت اسکی گؤرموشم، هله قالا اوستونه مینیب شَهرچایی سدی دالیندا ویراژ وئریب جت اسکی سورم. سدین دادی بونلارین داماغینا چاتیب، اونو بوراخیب گلیب اورموگؤلون توتمازلار کی. منه باخمایین بیر چنگه اوشاق ایکن، کاظیم داشین اوستوندن اورمو گؤلونه ایکی یوز متر اوجالیقدان شیرجه ووراردیم! بلی. شیرین سو دا اؤزمک هونر دئییل هامی نین الیندن گلر.

بیزلرین آللاه وئرگی سی اولاراق، استخری ده جت اسکی سی ده، جکوزی و سوناسی دا اورمو گؤلویدور اونودا اَلیمیزدن آلدیلار.

رحمتلیک «معجز» دؤز دئییرمیش:

بو عصرده یاشاماق چوخ چتیندی مَمدعلی

بو عصرده یاشاماق ایسته سن گل اولما دَلی

بو عصرده یاشاماق ایسته سن بیر آز دینج دور

غنی کیمین تپیک آتما اگر جیبین بوشدور

بو عصرده یاشاماق پوللولار اوچون خوشدور

یوخسا پول، اؤله جک سن وصیت ائیله مه لی! یازار: محمدعلی ارجندی ـ نشریه آغری ـ یکشنبه دهم اردیبهشت 91