میللتیندن آلدی آدین میللی سردار ستارخان
25 آبان ـ میللی سردار ستارخانین ایل دؤنومو ایله ایلگیلی
میللتیندن آلدی آدین، میللی سردار ستارخان
محمدعلی ارجمندی ـ ماهنامه آفتاب آذربایجان ـ آبان 90 ـ شماره 59
آنا وطن اوغلون آتماز، داشین سیلیب آیاقلاماز
آیلارایللر اؤتوب دؤنسه ، اتین یئسه سومویون آتماز«آیین شایین »
ستارخان، دفعه لرله آدین یازیب دیله گتیریرم. بیلمیرم بئلنچی بیرایگید قهرمانی تکجه بیر نئچه سطیرده یازیب دیله گتیرمک اولارمی! ایسته میرم گؤردویو بؤیوک ایشلریندن، مشروطه دن، اون بیر آیلیق آجلیق چکیب ظولمه باش یئندیرمه ین تبریزدن، ائمره قیزدان، هابئله مراکیش ده ستارخانا عایید اوخونان حیماسی شعرلردن، آوروپانین، آمریکانین چئشید لی قازئتلرینده او جومله دن «نیویورک هرالد» دا گونده لیک سردارا عایید یازیلان سؤزلردن، ویا خود ایران مشروطه اینقلابی نین بو بؤیوک قهرمانا نه قدر آسیلی اولدوغون تکرارلی یام. ستارخانین تانینماسینا بیرجه بو تانیلمیش جومله کیفایتدیر
بوتون شرق دونیاسی ایله ایراندا آزادلیق اوغروندا قورولان سنگرلردن تکجه آذربایجان قالدی، آذربایجاندان تبریز، تبریزدن ائمره قیز کوچه سی، بوکوچه دن ده ستارخانین ائوی و نهایتده بو ائودن یئنی دن باشلایاراق بوتون تبریز ، آذربایجان آیاغا قالخدی.
هامیمیز یاخشی بیلیریک و تانیییریق، ستارخانین آزادلیق اوغروندا آپاردیغی موباریزه لر تکجه آذربایجان ایله ایراندا یوخ بلکه بوتون شرق دونیاسیندا یوکسک یئر توتور ائله جه ده بونو آرخایین دئمک اولار ایَر ایرانین مشروطه آدلی اینقیلابی بوتون اورتا آسییا و شرق دونیاسیندا بیرینجی آزادلیق اینقیلابی آدلانیرسا بو اینقیلابین اوجامان قهرمانی ستارخان دا بوتون بو حرکاتین دان اولدوزو ساییلیر، نئجه کی بؤیوک شاعیر میرزا علی اکبر صابیر ده او زامانلار بو حقیقتی دوشونه ره ک سؤیله ییب:
ایشته ستارخان، باخیز ایرانی ائحیا ائیله دی
تورکلوک، ایرانلی لیق تکلیفین ایفا ائیله دی
ایشته ستارخان باخیز، بیر نووعی ایقدامات ائدیب
بیر وزیر و شاهی یوخ، دونیانی یکسر مات ائدیب
صوحبت ستارخان دان گئدیکده تکجه بیر آد دئییل، بلکه بیر اولوسون قوتسال آماجیندان سؤز گئدیرکی تاریخ بویو بوتون دوشمنلره قارشی او جومله دن قان ایچن روس اوردوسونون ظولمونه قارشی عصیان ائدیب آدینا لاییق حماسه لر یارادیب، ستارخان دا بئلنچی بیرایگید سئور خالقین قهرمان اوغلو اولاراق ایللر اؤنجه اونودولماز حماسه یارادیبسا تاریخ بویو آدی ایله یولو خالقی طرفیندن قارشیلانمالیدیر.
هر حالدا 25 آبان ـ میللی سردار ستارخانین اؤلوم ایل دؤنومو گونو اولاراق بیر داها اونون و خالقیمیزین بؤیوک ایشلرین گؤزوموزون اؤنونه گتیرسه بئله بیر داها یئنی دن بیزیم بوگونکو گؤره ویمیزی و گاهدان اونوتقانلیغیمیزی خاطیرلادیر، بوتون دونیا میللی قهرمانلارا بسله ندییی حؤرمتی گؤروروک ، تاسفله بیزلرین آراسیندا بئله دئییل، بیلمیرم ندن!
گونئی آمریکانین میللی قهریمانی چه گووارانین، شکیلین کؤینکلریمیزه و میدالین بویون بوخوووموزا سالاراق ستارخانین باش داشین آیاقلاییب کؤکو اولمایان اینسانلار تک اوزرینده آددیم آتیریق. کره ـ نین میللی قهرمانی جومونگی، آردی اولاراق یاییریق، قیلینجینی اوشاقلاریمیزین اللرینه وئریریک، آما اؤز میللی قهرمانلاریمیزدان چوخ راحاتجاسینا گؤز اؤرتوب کئچیریک.
ایسلامی اؤلکه میزین تاریخیندن، کؤلتوروندن، سؤز آچساقدا هامیسین ساده جه ایسلام دان اؤنجه هخامنشی آد دا بیر ائلات شاهلیقدا خلاصه ائدیب قول قاناد وئرمیشیک و اوندان قاباق و سونرا هئچ نه گؤرموروک و ایسته میریک هئچ نه گؤرونه. کئچن شاهلیق رژیمین «جشن های 2500 ساله» نی یادا سالان یانلیش باخیم، ایندیلیکده جریان انحرافی یولو و نه بیلیم مکتب ایرانی منهای ایسلامی سؤزلری ایله او قدر داوام وئریلیر کی ایسلامی اؤلکه میزین معظم رهبری ده دیله گله ره ک دئییر:
«ایرانین پارلاق تاریخین، ایسلامدان قاباقکی غدار سلسله ده یوخ، بلکه ایسلامدان سونرا کی سلجوقیان، دیلمی لر و صفویه کیمی دؤولتلرده و اونلارین آپاردیقی بؤیوک ایشلرده گؤرمه لی ییک»
بلی، ستارخان دا بؤیوک بیر مسلمان موجاهید اولاراق، آدی تاریخیمیزین قیزیل صحیفه لرینده یازیلیب ابدی اولاراق قالاجاق. بس نه یاخشی بئلنچی بیر قهرمانلاریمیزی کی حقیقتا داهی ساییلیر جاوانلاریمیزا هابئله گله جک نسیللریمیزه داها آرتیقراق تانیتدیراق، ستارخانین دوننکی روس کونسولونا وئردییی یانیت جاواب : «یئدی اؤلکه نی حضرت عباس بایراغی آلتینا گتیرسم بئله اجنوی اؤلکه نین بایراغی آلتینا یئنمَرم» بوتون تاریخ بویو بیزلره بیر مکتب سایلماقدان علاوه میللی سردارین نه قدر وطن پرور اولدوغون هابئله گئنیش باخیشین یئتیریر.
ستارخان، باقرخان، حسین باغبان، علی میسیو و ... قارشی، مشروطه اینقیلابیندا چوخلو موخالیف خانلار، سلطنه لر، فلان الدوله لر اولسالاردا داها ایندی هئچ بیرینین آدی سانی یوخدور. او دئوریمده مخبرالسلطنه لره تای تولکولر ایله یپرم خانا تای داشناکلار، پرده دالیندا اؤز سیاستلرین یئریتسه لرده سانکی آزادلیق اوغروندا ابدی قالان آدلار ستارخان و ستارخانا تای قهرمانلاردیر، او قهرمانلار کی اون بیر آی آجلیق چکیب، رحیم خانلارا، شجاع النظام لارا، عین الدوله لره و بوتون دوولتین چئشیدلی قوشونلارینا میدان وئرمه دن سونرا غدار روس، اینگیلیس ایستعماری واونلارین حیمایه سی آلتیندا اولان، یئنی مشروطه اینقیلابینا صاحیب چیخان دوننکی فئوداللار ایله خانلارا توش گلیب تبریز دن دیدرگین دوشوب تهراندا الوان الوان بوسقولارلا راستلاشیرلار و نهایتده ایندیکی روسیه سفیرلییی نین یئرینده قرار تاپان اتابک آدلی پارکدا بیر بؤیوک تراژیک صحنه اولاراق مشروطه اینقیلابی نین حقیقی قهرمانلاری، موجاهیدلری بیرـ بیر سولوب و زامان بویونجا اینانیلماز آغیر دوروما دوشوبلر.
میللی سردار ستارخان دا، اتابک فاجیعه سینده قیچیندان یارالاناراق دؤرد ایل بو آغیر دوروما غربتده دؤزندن سونرا نهایتده 1293 ـ جی گونش ایلی نین آبان آیی نین 2۵ ـ اینده تکجه 4۸ یاشی اولاراق دونیاسین دییشیب و جیسمینی تهرانین شاه عبدالعظیم حرمینده تورپاغا تاپشیریرلار. ستارخانین مزاری ایندیلیکده آذربایجانین دیگر آدلیم موجاهیدی شیخ محمد خیابانی ایله یاخین فاصیله ده اولاراق حضرت عبدالعظیم حرمی نین محوطه سینده بیر ساده قبیر داشی نیشان اولاراق قرار تاپیب. یازار: محمدعلی ارجمندی ـ ماهنامه آفتاب آذربایجان ـ آبان 90 ـ شماره 59
محمدعلی ارجمندی (آيين شايين)