آیین شایین ـ 1 باکیلاس دانشجولار! آرتینین ماماسی. قیزلار. اورمو گولو و ...

نشریه آغری آذربایجان، ، یکشنبه نهم بهمن 90  نوشته محمدعلی ارجمندی

بیلیرسیز ایلک اوشاقلیقدان خوشلامارام گیزیلینجه سؤزه قولاق آسام، آما واللاه بعضی سؤزلر ائله قشنگ دیر آدامی ماراقلاندیریر هاردا قالا قشنگ سؤزلردن علاوه دانیشان آداملاردا بسیار قشنگ و دلربا اولا، نیله مک، ایکی باکیلاس دانشجونین دیالوگو ایستر ایستمز منی اؤزلرینه ساری چکدی.

«آره»بو سوال دا آزمون دا گلمیشدی!» ــ «فیکر ائلیرم تست لرین چوخونو ـ درست ـ وورموشام!»

«باور ائله منده چوخ عالی وورموشام!» ــ « آره اوجوردو، ستایش منیم ساعت شش! قراریم وارفعلا بای!»

ملیکا صاباح وارسان؟ آره، راستی ستایش همراهیمی! عوض له میشم یاداداشت ائله آخشام تک! آتارام صوحبت ائلییریق! صفر نهصد و سی هشت و ....!!!

کالافهیم اینسان اولمایاسان نیله مک، منده اوز اوزومه دئییرم آللاه بو سویوق هاوادا آری «زنبور» هاردایدیر بو ایکی قیز هی اویان بویانا باخیب آری دئییللر، دئمه جانیم آری، بلی یوخسا هه نین، باکیلاسی دیر، اینصافا باخین نه قشنگ، اوره یه یاتیم دیر! بئلنجی سؤزلری دیله گتیردیکده بیر بالاجا دا سسیمیزی اینجه له ده جه ییک، دا دئمه، نه اولار. ... کش اولاریق. فقط آماندی غلیظ تورکو دانیشمایاق اوندا کندلی دئییللر، البته دئسک «عزیزم من ترکی بلد نیستم» داها یاخشی با کیلاس اولاریق! اینانمیرسیز باخین گؤرون بوتون سوپراستار لار نئجه دانیشیر، ایندیسه من دئمیرم، اؤزونوز دئیین هانسی عاغیللی آدام، کانال اوچ یوخ ها، شبکه سه یین گؤزل گؤیچک عشقولانه سریاللارین، باغیشلایین بی کیلاس دانیشدیم مجموعه تلویزیونی لرین قویوب گلر اوستانی کانال لارین موحتشم سرییالارینا باخار.

یوخسا هانسی بیر دلی تاپیلار او گؤزللیکده «خانواده سبزـ همشهری جوان»ی بوراخا، گله، نه بیلیم هادارام پادارام، یازان! «آغری» یئددی جه لیینی، یوخسا کاهی کاغاز دا چاپ اولان ثمرسیز «آفتاب آذربایجان» درگی سینی اوخویا. منی اینانین تاپیلسادا آز سایلی دلی دولو ساو ساق اینسانلاردیر.

هله بوندان علاوه بیر آیری اولایی دا دئیه جه یم، نینه ییم اوزومدن دئییل قولاق گوناهکاریام! بیر نئچه گون بوندان قاباق آغیر قار یاغان گون، ایالته درگی نین دفترینه گئدن زامان گؤزونیز یامانلیق گؤرمه سین بو سفر باشقا بیر دهشتلی باکیلاس حرکتیله اوز به اوز اولدوم، نئجه؟! بیر آنا اوشاقینا قیشقیراراق دئییر «آرتین، دئمه میشم برف بازی! ائله مه، ییخیلارسان لباس لارین کثیف اولار!» دئنن آرواد دیلین آغزیندا شیشسین، سؤز آغزیندان یئره دوشمه میش اوشاق نه سه آیاغی زوووب یئره ییخیلدی. آما سؤز بوراسیندادیر، بو حالدا دا گرک اؤز با کیلاس لیغیمیزی ایتیرمه یک، نئجه کی آرتین نین ماماسی دا اؤز باکیلاسلیغین ایتیرمه دی.و صدا وسیمانین مخبیر ایله اوز به اوز اولدوقجادا اونون سورولارینا «با کمال میل» جاواب وئریر.

مخبیر: خانیم آماندی مواضب اولون اوشاق ییخیلماسین

آرتینین ماماسی: وای اوشاغین دالی یانسین از بس که شلوغ ائلییر

مخبیر: نئجه کی اوزویوز شاهید سیز، شهریمیزی گؤزل قار آغ دونو ایله بزه ییب، سیز آللاهین بو گؤزل نعمتین نئجه توصیف ائده بیلرسیز بیر حالدا کی دریامیزادا چوخلو ثمرلی اولوب و همچنین خشکسالی یه پایان وئره بیلر، لوطفن اؤز احساسیزی بیزه دئیین.

آرتینین ماماسی: بلی خواهیش ائلییییرم، به نام خدا، سلام عرض دییرم هامی همشهریلریمه، منده چوخ خوشحالم بویون شهریمیزه برف گلیب! و امیدوارم بو برفین ادامه سی اولا.

مخبیر: خانیم دریایا گؤره دانیشمادیز: آرتینین ماماسی:  نه، متوجه اولدوم اما چه می شود کرد معشیت الهی دی دااااااا! سؤزون دوزو منیم سیاستدن باشیم چیخماز! تنها بونو دئییه بیلرم کی، استخرلرده شنا ورزشینه ادامه وئره بیله ریک، سورا من خودم شنا، یوگا، آیروبیک و ... ایشله رم.

استریو دا کی آپاریجی «مجری»: بلی عزیز تاماشاچی لار بیر فنی ایشکالا گؤره مستقیم ایرتیباطیمیز کسیلدی، همکارلاریم تمامی تلاش لارین ائلییرلر ایرتیباطیمیز دوباره دن برقرار اولا.

بلییییییییی!!!

منجه آیین شایین یازی میز ایلک اولاراق بو قه در گؤرموش اولار. بوتون سیز آغری اوخوجولارینا  «آذربایجان اورمیه تلویزیونون» تورکجه اخبار دیین لرینه تای، سلام یوخ ها «درود» گؤنده ریب، گلن گؤروشه دک پروردگار متعالا تاوشیریرام. البته بونودا دئمه لییم سیزلرده باکیلاس یازی لاریزی منله پایلاشا بیلرسینیز، هئچ اولماسا sms، گؤندریب چوخ چوخ اوزر ایستیرم پیامک دئیه جه یدیم،اؤز دستک اینیزله آیین شایین بؤلومونه یاردیمجی اولون یوخسا هامی دان اؤنجه بیزیم بو بی کیلاس باش یازاریمیز«سردبیریمیز» منیم قول قانادیمی باغلایاجاق. ایندیسه مندن دئمک قالانین خود دانی!!!

هرحالدا باکیلاس قالین، باکیلاس یاشایین، خوداحافظ.